У Курапатах узгадалі ахвяр сталінізму

• 30.12.2008, 8:32

29 снежня ва ўрочышчы Курапаты пад Менскам прайшло традыцыйнае памінанне ахвяр сталінізму.

Як паведаміў БелаПАН намеснік старшыні секцыі «Мемарыял» Беларускага добраахвотнага таварыства аховы помнікаў гісторыі і культуры Ўладзімір Раманоўскі, удзельнікамі памінання сталі каля 20 моладзевых актывістаў, былых вязняў ГУЛАГа і сябраў секцыі «Мемарыял».

Яны ўсклалі кветкі да мемарыяльных знакаў, у тым ліку да Крыжа пакут, запалілі лампады, ушанавалі хвілінай маўчання памяць бязвінна загубленых людзей, выканалі песні нацыянальнага адраджэння. За памінаннем назіралі сем прадстаўнікоў сілавых структур.

Цяперашняе памінанне стала 25-м. Трэці год 29-га чысла кожнага месяца прадстаўнікі грамадскасці прыходзяць у Курапаты, каб ушанаваць памяць бязвінных ахвяр сталінізму і зацвердзіць у грамадскай свядомасці дату 29 кастрычніка як Дзень памяці ахвяр палітычных рэпрэсій у Беларусі. «Пакуль мы праводзім такія акцыі, ёсць надзея, што праблема рэпрэсаваных набудзе грамадскае гучанне і знойдзе адлюстраванне ў дзяржаўнай палітыцы», — падкрэсліў У.Раманоўскі.

24 снежня ва ўрочышчы Малы Трасцянец (Благаўшчына) у Менскім раёне прадстаўнікі грамадскасці ўсталявалі і асвяцілі шасціканцовы крыж найсвяцейшай Ефрасінні Полацкай у памяць аб ксяндзе-плябане Менскага касцёла святых Сымона і Алены (Чырвонага касцёла) Вінцэнце Гадлеўскім, забітым нацыстамі ва ўрочышчы 24 снежня 1942 года. «Вырашана ўзвесці ў Малым Трасцянцы велічны Крыж пакут у памяць аб тысячах грамадзян Беларусі і іншых краін, загубленых камуністычным і нацысцкім таталітарнымі рэжымамі ў перадваенныя і ваенныя гады на тэрыторыі ўрочышча», — сказаў У.Раманоўскі.