У Нясвіжы гарэла ратуша

• 24.06.2008, 16:18

Сёння ўдзень у Нясвіжы гарэла ратуша, над горадам былі відны велізарныя клубы дыму. Пажар тушылі каля гадзіны. На месца здарэння прыехала ўсё кіраўніцтва горада.

Як паведамляе “Еўрарадыё”, у тушэнні пажару ў ратушным комплексе ў цэнтры горада бралі ўдзел пяць экіпажаў пажарных машын, якія прыехалі не толькі з Нясвіжу, але і з Лані. Да ратушы непасрэдна прымыкае комплекс будынкаў, кнігарня, архіў... Там жа і рэстарацыя.

У дворыку паміж рэстарацыяй і ратушай стаяў мангал, дзе гатаваліся шашлыкі. Паводле некаторых звестак, нібыта, іскры ад мангалу патрапілі пад дах.

На месцы здарэння сабралася ўсё мясцовае кіраўніцтва на чале са старшынём райвыканкаму. Журналістаў у ратушу не пускаюць. Аднак вонкава здаецца, што яна не вельмі моцна пацярпела.