Свет памятае аб гвалтоўных знікненнях у Беларусі (Фота)

• 2.09.2008, 17:38

У Міжнародны дзень зніклых людзей ініцыятыва «Мы памятаем» правяла ў Амстэрдаме акцыю памяці гвалтоўна зніклых Юрыя Захаранкі, Віктара Ганчара, Анатоля Красоўскага, Зміцера Завадскага.

Акцыя памяці праходзіла з 14:00 да 15:00 па мясцовым часе на цэнтральнай плошчы Амстэрдама Leidseplein. Мерапрыемства было санкцыянаванае мясцовымі ўладамі.

Удзельнікі мірнай дэманстрацыі трымалі банер з партрэтамі Юрыя Захаранкі, Віктара Ганчара, Анатоля Красоўскага, Зміцера Завадскага і подпісам «Гвалтоўна зніклі ў Беларусі», а таксама звязак белых і блакітных паветраных шароў з прымацаванымі да іх фатаграфіямі зніклых беларусаў.

У канцы акцыі яе ўдзельнікі адпусцілі паветраныя шары, і партрэты Юрыя Захаранкі, Віктара Ганчара, Анатоля Красоўскага, Зміцера Завадскага ўзняліся ў неба.

Акцыя выклікала цікавасць у мінакоў, якіх у гэты дзень у цэнтры Амстэрдама была вялізная колькасць. Шматлікія падыходзілі да ўдзельнікаў акцыі, распытвалі, да чаго яна прымеркаваная, задавалі пытанні аб сітуацыі ў Беларусі, выяўлялі сваю салідарнасць з тымі, хто дамагаецца праўды аб гвалтоўных знікненнях.

У 1999 годзе ў Беларусі гвалтоўна зніклі тры вядомых чалавека — былы міністр унутраных спраў Юрый Захаранка, віцэ-спікер Вярхоўнага Савета XIII склікання Віктар Ганчар, буйны прадпрымальнік Анатоль Красоўскі. Усіх гэтых людзей аб'ядноўвала адно: яны былі адкрытымі апанентамі рэжыма Лукашэнкі. Улетку 2000 года бясследна знік былы асабісты аператар Лукашэнкі Зміцер Завадскі. Аб лёсе Юрыя Захаранкі, Віктара Ганчара, Анатоля Красоўскага і Зміцера Завадскага іх родным і блізкім дагэтуль нічога не вядома.