Аўстралійскія хронікі Мікалая Халезіна (Фота)

• 16.01.2009, 12:59

Унікальная падзея ў гісторыі беларускага мастацтва – "Свабодны тэатр" з поспехам гастралюе па аўстралійскім кантыненце.

Вядомы беларускі драматург, кіраўнік "Свабоднага тэатра" Мікалай Халезін вядзе ў сваім блогу хронікі аўстралійскіх гастроляў. У іх вы даведаецеся таксама аб сустрэчах з беларускай дыяспарай і сусветнымі зоркамі, жыцці абарыгенаў, нападах акул і блакітных медузах.

Аўстралійская тэатральная сістэма, піша Мікалай Халезін, вытканая з лепшых напрацовак розных краін, але аснова яе, безумоўна, брытанская, што ставіць Аўстралію зусім не ў шэраг тэатральных аўтсайдараў. У Аўстраліі, як ні ў якой іншай краіне, мегазоркі кіно знаходзяцца ў непасрэднай блізкасці ад тэатра. Гэта значыць, калі ў вас ёсць канкурэнтаздольны праект, які вы можаце прапанаваць зорнаму актору - вы атрымаеце аўдыенцыю значна прасцей, чым у Амерыцы або Англіі. На сцэне сіднэйскага тэатра Belvoir St Theatre працавала вялікая колькасць зорак такога ўзроўня, як, да прыкладу, Стыў Марцін.

А оскараносны Джэфры Раш і зусім з'яўляецца адным з сябраў апякунскай рады гэтага тэатра. У фае ён глядзіць на гледачоў з афішы спектакля "Запіскі вар'ята", які быў сыграны некалькі год таму на сцэне маскоўскага тэатра "На Таганцы".

Sydney Festival, у якім прыняў удзел беларускі "Свабодны тэатр", з'яўляецца адным з вядучых сусветных культурных падзей у свеце - ягоны маштаб перакрывае любы з еўрапейскіх фестываляў як колькасцю зорак-удзельнікаў, так і велізарнымі аб'ёмамі фінансавання.

Асобная тэма - "зоркі" фестываля. Іх тут шмат, і знаходзяцца яны ў непасрэднай блізкасці ад аўдыторыі - іх літаральна можна памацаць рукамі. Цікаўна, што зорныя "хэдлайнеры" дзеляцца тут на дзве катэгорыі - "сусветныя зоркі" і "зоркі сфер". "Сусветныя зоркі" гэтага фестываля: Робер Лепаж - канадскі рэжысёр-геній са сваім спектаклем "Lipsynch"; харэаграфічная група Morphoses Крыстафера Ўілдана - сусветны фаварыт сучаснага танца; Sydney Theatre Company са спектаклем "Вайна руж" па творах Шэкспіра з шыкоўнай Кейт Бланшэт; Грейс Джонс са сваім The Hurricane Tour, што вярнуў гэтую унікальную спявачку слухачам.

Асобным радком праграмы фестываля ідзе Нік Кейв, якому на водкуп аддадзеная цэлая выспа, дзе кожны вечар праходзяць канцэрты па складзенай ім праграме. Кейв прадстаўляе маладых музыкаў самых розных стыляў і напрамкаў, акрамя куратарскай дзейнасці не забываючы і аб уласных сольных выступах.

Эшалон "зорак сфер" уяўляе сабой творчыя калектывы, што сталі папулярнымі ў сваіх асяроддзях. Сюды можна аднесці вянгерскі Katona Jozsef Theatre, які прывёз у Сіднэй свайго "Іванова"; нью-йоркскі Nature Theater of Oklahoma, з якім мы сустракаемся на розных кантынентах ужо ў пяты раз; джазавае Moscow Art Trio Альперына, Шылклапера і Старасціна; Глена Хансарда і Маркету Ірглову - зорак ірландскага музычнага фільма "Аднойчы", якія паспяхова вядуць канцэртную дзейнасць, і, уласна, беларускі "Свабодны тэатр", які паказвае ў Сіднэі свой спектакль "Быць Гаральдам Пінтэрам".

Падрабязней аб аўстралійскіх гастролях "Свабоднага тэатра чытайце ў блогу Мікалая Халезіна.