Беларускія прадпрыемствы пераходзяць з газу на мазут

• 21.01.2009, 10:01

Прадпрыемствы са студзеня пераходзяць на дадатковае выкарыстанне мазуту і мясцовых відаў паліва на падведамасных энергакрыніцах у мэтах замяшчэння прыроднага газу.

Аб гэтым паведамілі БелТА у дэпартаменце па энергаэфектыўнасці Дзяржстандарту.

"Па даручэнні ўрада і ў сувязі з неабходнасцю скарачэння выдаткаў на вытворчасць прадукцыі, выпрацоўку цеплавой і электрычнай энергіі ў рэспубліцы распрацаваныя і прымаюцца меры па замяшчэнні прыроднага газу топачным мазутам і мясцовымі відамі паліва", - адзначылі ў дэпартаменце. Рэалізацыя гэтых мерапрыемстваў знаходзіцца пад кантролем урада.

У сваю чаргу, канцэрн "Белнафтахім" у студзені бягучага года пастаўляе ўвесь выраблены мазут на ўнутраны рынак.

"Паводле пратаколу, які вызначае парадак абарачэння энергарэсурсаў, экспарт мазуту ў студзені не ажыццяўляецца. Канцэрн накіроўвае ўвесь аб'ём мазуту на ўнутраны рынак для забеспячэння прадпрыемстваў энергетыкі", - адзначылі ў "Белнафтахіме".

У канцэрне не ўдакладнілі, калі плануецца аднавіць экспарт беларускага мазуту, адзначыўшы, што рашэнне прымае працоўная група ва ўрадзе. Адпаведны пратакол зацвярджаецца на кожны месяц.