Лукашэнка асабіста паабяцаў Какойты прызнаць незалежнасць Паўднёвай Асеціі
- 29.01.2009, 8:26
Пра гэта прэзідэнт непрызнанай рэспублікі Паўднёвая Асеція Эдуард Какойты паведаміў у інтэрв'ю расейскай прэсе.
- Нешта Беларусь марудзіць з вашым прызнаннем, -- пацікавіўся журналіст расейскай «Комсомольской правды» у кіраўніка Паўднёвай Асеціі.
- Яны нам абяцалі, што абавязкова гэта зробяць. Лукашэнка кажа: я сваё слова стрымаю, абавязкова ў хуткім часе будзе прызнанне. Мы на пахаванні Алексія II нефармальна сустракаліся: я, Багапш і Лукашэнка, -- паведаміў Эдуард Какойты.
Акрамя таго, у гэтым жа інтэрв'ю Какойты адназначна заявіў: «Мы будзем ставіць пытанне і аб уваходжанні ў «саюз» Расеі і Беларусі».
Сёння ж стала вядома, што грузінская дыяспара Беларусі звярнулася да «палаты прадстаўнікоў» РБ з нагоды разгляду ў красавіку пытання аб прызнанні дзяржаўнасці Абхазіі і Паўднёвай Асеціі. На думку прадстаўнікоў дыяспары, прызнанне незалежнасці гэтых рэспублікаў можа надоўга сапсаваць адносіны паміж Грузіяй і Беларуссю, перадае расейская «Независимая газета».
Як паведамлялася раней, «парламент» Беларусі адклаў разгляд пытання аб прызнанні Абхазіі і Паўднёвай Асеціі на вясну.
«Рэгіёны Абхазіі і Паўднёвай Асеціі, пры падтрымцы РФ, абвясцілі дзяржаўную незалежнасць, у парушэнне ўсіх палажэнняў міжнароднага права, - зазначаюць прадстаўнікі грузінскай дыяспары. - Услед за Расеяй толькі Нікарагуа і «Хамас» прызналі самаабвешчаныя рэспублікі Абхазія і Паўднёвая Асеція. У той час як увесь цывілізаваны свет прызнае тэрытарыяльную цэласнасць Грузіі».
«Бо і ад вашага рашэння залежыць далейшы лёс Грузіі і шматлікіх народнасцяў, якія насяляюць яе. Акрамя таго, вашае рашэнне не можа не адбіцца на міжнародным аўтарытэце Беларусі, краіны, якая для шмат каго з нас стала другім родным домам і, адпаведна, будучыня якой нам неабыякавая. Мы заклікаем вас не абмяжоўвацца кароткатэрміновымі інтарэсамі і паглядзець у будучыню нашых адносінаў. Прызнанне самаабвешчаных рэспублікаў можа надоўга сапсаваць адносіны паміж нашымі дзяржавамі, што, несумнеўна, з'явілася б вялікай памылкай, якую прыйшлося б выпраўляць нашым дзецям і ўнукам», - заяўляюць аўтары звароту.