Павал Сапелка: «Па законе Аўтуховіча даўно павінны былі вызваліць»
- 14.12.2009, 12:59
Адвакат палітвязня Мікалая Аўтуховіча лічыць, што ў беларускіх уладаў няма падставаў ўтрымліваць ваўкавыскага прадпрымальніка пад вартай.
«Мы працягваем знаёміцца са справай, больш нічога новага няма», - распавёў у інтэрв'ю «Радыё Свабода» адвакат Павал Сапелка пра справу палітвязня.
Павал Сапелка заявіў, што на тле справы Аўтуховіча сітуацыя з правамі чалавека ў Беларусі не палепшылася.
«На мой погляд, калі кіравацца законам, Аўтуховіча даўно трэба было вызваліць. Думаю, у такой сітуацыі можа апынуцца шмат беларусаў, з тым жа вынікам», - сказаў адвакат ваўкавыскага прадпрымальніка.
Адвакат Тамара Сідарэнка, якая абараняе Уладзіміра Асіпенку, кажа, што цяпер яны знаёмяцца з матэрыяламі справы.
«Сядзім, чытаем. Яшчэ нічога не скончылі. Толькі палову прачыталі. Спадзяемся, што да канца тыдня ўсё дачытаем і будзем мець поўнае ўяўленне. Пакуль што мой падабаронны, вывучаючы матэрыялы, плюецца, кажа: «Трызнненне!», - Распавяла Тамара Сідарэнка.
Усяго справа Аўтуховіча-Асіпенкі аб падрыхтоўцы тэракту супраць высокапастаўленых чыноўнікаў і пашкоджанні маёмасці пэўным асобам налічвае 17 тамоў дакументаў. Вінаватымі ваўкавыскія прадпрымальнікі сябе не прызнаюць.
Як раней паведамляў сайт charter97.org, ваўкавыскія прадпрымальнікі Мікалай Аўтуховіч, Юры Лявонаў і Уладзімір Асіпенка былі затрыманыя 8 лютага 2009 года. 18 лютага ім было прад'яўленае абвінавачванне па арт. 218 КК. 23 чэрвеня ў дачыненні да Аўтуховіча і, як паведаміла МУС, «іншых асобаў» была ўзбуджаная справа па арт. 359 КК (тэрарыстычны акт) у выглядзе падрыхтоўкі (арт. 13).
8 жніўня Лявонава вызвалілі з менскага следчага ізалятара, а 24 верасня з яго былі знятыя ўсе абвінавачванні.
З 16 красавіка па 16 ліпеня палітвязень Аўтуховіч праводзіў галадоўку, патрабуючы ў самыя кароткія тэрміны альбо перадаць справу ў суд, альбо змяніць усім падследным меру стрымання з утрымання пад вартай на падпіску аб нявыездзе.
Праваабаронцы лічаць затрыманых палітычнымі вязнямі, звяртаючы ўвагу на тое, што Аўтуховіч і Лявонаў раней ужо былі асуджаныя і прызнаныя міжнароднай супольнасцю вязнямі сумлення.