Чыноўнікаў будуць ставіць на «праслухоўванне» без санкцыі пракурора
- 8.12.2009, 8:54
Па новым законе ў сілавікоў з'явіцца больш магчымасцяў для працы.
На мінулым тыдні «дэпутаты» у першым чытанні прынялі папраўкі ў заканадаўчыя акты па пытанні ўзмацнення барацьбы са злачыннасцю. Дакумент, напрыклад, дасць права міністру ўнутраных справаў, старшыні КДБ, дырэктару дэпартамента фінансавых расследаванняў запускаць некаторыя аператыўна-вышуковыя мерапрыемствы. Сілавікі і ДФР змогуць даваць дабро на ўзяццё пад варту, ператрусы, праслухоўванне тэлефонных размоваў, паведамляе «Комсомольская правда в Беларуси».
Зараз усё гэта немагчыма рабіць без санкцыі пракурора.
- Такія дзеянні будуць прымацца ў выключных выпадках, у першую чаргу для папярэджання цяжкіх, асабліва цяжкіх і карупцыйных злачынстваў, - патлумачыў дырэктар Нацыянальнага цэнтра заканадаўства і прававых даследаванняў Вадзім Іпатаў.
Дакумент дасць права праваахоўнікам высокага ўзроўню дазваляць правядзенне аператыўна-вышуковых мерапрыемстваў і ўзбуджаць крымінальныя справы ў дачыненні да асобных катэгорыяў асобаў. Напрыклад, асобаў, якія ўключаныя ў рэестр кіраўніка дзяржавы, дэпутатаў «парламента» і мясцовых саветаў.
Як лічаць эксперты, робіцца гэта каб знізіць узровень карупцыі.
Калі запрацуе новы закон, пакуль не зразумела. Будзе яшчэ дапрацоўка і другое чытанне.
Старшыня юрыдычнай камісіі Беларускага Хельсінскага камітэта Гары Паганяйла ставіцца да новага закона насцярожана:
- Трэба яшчэ пачакаць закон у гатовым выглядзе і ўчытацца ў яго. У Беларусі робіцца ўсё для таго, каб органы правапарадку, аператыўныя службы мелі «аператыўны прастор» у сваіх дзеяннях.
Санкцыю на арышт будзе выдаваць тое ведамства, якое ўзбудзіла крымінальную справу. Будзе спрошчаная працэдура ўзяцця пад варту падазраваных грамадзянаў. Не патрэбны будзе дадатковы кантрольны орган у асобе пракуратуры, які даваў санкцыі на гэтыя арышты. Аператыўныя службы і так не бянтэжыліся неабходнасцю даказаць і атрымаць дазваленчыя санкцыі. Гэта робіцца пад сцягам барацьбы з карупцыяй. Але можа прывесці да таго, што вузкаведамасныя інтэрасы будуць штурхаць спецслужбы на незаконныя аператыўна-вышуковыя мерапрыемствы, якія фармальна могуць быць і санкцыянаваныя, але з мінімальнымі падставамі.