Уга Чавес паўтарыў шлях Лукашэнкі – дыктатар зможа заставацца ля ўлады больш за два тэрміны

• 16.02.2009, 9:23

Прэзідэнт Венесуэлы Уга Чавес выйграў рэферэндум і цяпер зможа балатавацца на пасаду прэзідэнта неабмежаваную колькасць разоў.

«Чавес любіць нас, і на каханне трэба адказваць каханнем» - так у прапагандысцкіх улётках венесуэльскіх улад была пазначаная галоўная прычына, з-за якой варта падтрымаць прэзідэнта. Другая прычына: «Чавес не здольны зрабіць нам дрэнна».

15 лютага Уга Чавес выйграў рэферэндум. Прыняцце папраўкі да канстытуцыі дазваляе прэзідэнту Венесуэлы, што знаходзіцца ля ўлады дзесяць год, ізноў вылучыць сваю кандыдатуру на выбарах 2012 года на новы шасцігадовы перыяд.

Прыхільнікі Чавеса лічаць, што для працягу «баліварыянскай рэвалюцыі» і пабудовы «венесуэльскай мадэлі сацыялізму XXI стагоддзя» неабходна забяспечыць палітычнае лідэрства Чавеса па меншай меры да 2019 года.

Такой жа пазіцыі прытрымліваецца і сам прэзідэнт, які высунуў сацыялістычны праект развіцця Венесуэлы.

«15 лютага мы ўпісалі новую старонку ў гісторыю нашай краіны. Вынікі рэферэндуму паказалі рашучую перамогу народа, рэвалюцыі», - заявіў Чавес, выступаючы на шматтысячным мітынгу ў Каракасе.

Чавес зачытаў віншаванні Фідэля Кастра, падкрэсліўшы, што перамога на плебісцыце з'яўляецца перамогай народаў Лацінскай Амерыкі.

Паводле афіцыйнага бюлетэня Нацыянальнага выбарчага савета, пасля падліку 94,2% галасоў 54,4% венесуэльцаў, якія прынялі ўдзел у плебісцыце, прагаласавалі за папраўку да канстытуцыі, супраць - 45,6%.

У плебісцыце прынялі ўдзел 70% з 17 мільёнаў зарэгістраваных выбаршчыкаў.

Апазіцыя Венесуэлы, у якой прыкметную ролю іграюць студэнцкія рухі, напярэдадні рэферэндуму правяла шматтысячныя мітынг, патрабуючы сыходу Чавеса ў адстаўку. Лідэры венесуэльскай апазіцыі выступалі пад лозунгам «Не, значыць, не», намякаючы на спробу змяніць канстытуцыю краіны, што ўваходзіць у Арганізацыю краін-экспарцёраў нафты (АПЕК), якая ўжо прадпрымалася Чавесам у 2007 годзе.

Лідэры апазіцыі вінавацяць Чавеса ў імкненні пабудаваць камуністычную дыктатуру і інкрымінуюць яму злоўжыванне ўладай для дасягнення перамог на прэзідэнцкіх выбарах.