Лукашэнка ўбачыў у беларускай эканоміцы «трывожныя тэндэнцыі»
- 17.04.2009, 13:24
Беларускі кіраўнік заявіў, што на складах растуць запасы, і пацікавіўся, колькі нагандляваў кожны чалец урада.
«Да гэтага часу ў нашых прадпрыемстваў не атрымліваецца прабіцца скрозь заслоны на знешніх рынках, скарачаюцца аб'ёмы прамысловай вытворчасці і спажывецкіх тавараў, і, што недапушчальна, і я расцэньваю гэта як злачынства, - растуць запасы на складах», - адзначыў Аляксандр Лукашэнка, заслухоўваючы справаздачу ўрада і Нацыянальнага банка аб праблемных пытаннях сацыяльна-эканамічнага развіцця і мерах па забеспячэнні дынамічнага развіцця беларускай эканомікі, якія прымаюцца, паведамляе «Інтэрфакс».
Лукашэнка таксама канстатаваў, што «з-пад кантролю выходзяць інфляцыйныя працэсы, і такім чынам зніжаюцца рэальныя прыбыткі насельніцтва».
«Словам, тэндэнцыі трывожныя і патрабуюць самога пільнай увагі ўрада і ўсіх органаў кіравання ў цэнтры і на месцах», - сказаў беларускі кіраўнік.
Лукашэнка перасцярог удзельнікаў нарады «ад дабрадушнага тону, асабліва чальцоў урада». Беларускі дыктатар адзначыў, што ў пададзеных урадам матэрыялах «чырвонай ніткай праходзіць думка, што ўсе неабходныя меры па абароне ад «знешніх шокаў» ужо прынятыя, планы па лібералізацыі эканомікі выконваюцца».
«Хачу перасцерагчы: калі, ужо, тыя, хто мне дакладваў, што прынятыя ўсе вычарпальныя меры, а выніку няма, значыць, той, хто дакладваў, сябе ўжо вычарпаў», - заявіў Лукашэнка.
Беларускі кіраўнік таксама заявіў, што хоча пачуць адказ на пытанне: «Ці прыведзены ўрад у сістэму каардынатаў працы, як міністэрства гандлю? Колькі нагандляваў кожны чалец урада, пачынаючы з прэм'ер-міністра і сканчаючы, асабліва, міністрам прамысловасці».
Беларускі кіраўнік заявіў, што чакае ад старшыні праўлення Нацыянальнага банка дакладу аб праблемах банкаўскай сістэмы.
«Як іх вырашае Нацыянальны банк і як паўплывала палітыка, якая праводзіцца ім, на сацыяльна-эканамічнае развіццё рэспублікі?», - адзначыў дыктатар.
Ён пацікавіўся тым, «як банкі дапамагаюць у вырашэнні праблемаў рэальнага сектара эканомікі і сацыяльнай абароны насельніцтва, які іх уклад у стымуляванне ўнутранага попыту на беларускую прадукцыю вытворча-тэхнічнага прызначэння і спажывецкія тавары?».
Беларускі кіраўнік падкрэсліў, што сёння «кадры вырашаюць усё». «Правільны лозунг, прыдуманы не мною», - сказаў ён.
Пры гэтым, звярнуўшыся да ўдзельнікаў нарады, Лукашэнка заявіў, што «калі хтосьці сёння не спраўляецца, дык сумленней будзе сёння сысці». «Калі я гэта буду бачыць – «за мной не заржавее». Рашэнні будуць прымацца неадкладна, незалежна хто гэта - банкір, прэм'ер-міністр ці міністр. Інтарэсы краіны і народа важней за ўсё», - заявіў ён.