Дыктатара панесла (Абноўлена)
- 23.04.2009, 14:08
Падчас штогадовага паслання да народа і так званага «парламенту» Лукашэнка казаў аб «планах» па ягоным звяржэнні і крызісе ў краіне.
Пачаў свой выступ беларускі дыктатар з пагроз у адрас апазіцыі і Захаду.
"Законнасць, непахіснасць канстытуцыйных асноваў, правапарадак будуць забяспечвацца ўсімі сіламі і сродкамі", заявіў кіраўнік дзяржавы. Па меркаванні Лукашэнкі, "цяперашні час дае нам унікальны шанец пазбавіцца ад усяго лішняга".
Беларускі кіраўнік прызнаў, што "чорнае крыло крызісу кранула і Беларусь". "Такая кошт інтэграцыі ў сусветную гаспадарку", адзначыў ён.
Лукашэнка асцярог "усіх, хто думае выкарыстаць момант у сваіх інтэрасах і спадзяецца палавіць рыбу ў каламутнай вадзе", перадае "Інтэрфакс".
Вакол ворагі народа
Беларускі дыктатар зноў абвінаваціў прадстаўнікоў апазіцыі ў здрадзе інтэрасам народа.
"Гэта не апазіцыя, гэта проста ворагі народа, таму што яны робяць тое, што ні ў адной дзяржаве, нават самай дэмакратычнай, недапушчальна", заявіў Лукашэнка, кажучы аб закліках апазіцыйных палітыкаў да Захаду спыніць супрацоўніцтва з ягоным рэжымам.
У прыватнасці, А.Лукашэнка згадаў ліст апазіцыянераў, у якім змяшчаецца заклік блакаваць удзел Беларусі ва "Ўсходнім партнёрстве" і не пускаць беларускага лідэра ў Прагу на саміт. Пры гэтым дыктатар, удакладніў, што дадзены ліст не падпісаў адзін з лідэраў беларускай апазіцыі Аляксандр Мілінкевіч, разумеючы, што "гэта гібель для краіны".
"Ці мае перспектывы такая апазіцыя і ейныя лідэры, калі яна выступае супраць нармальнага жыцця людзей?", задаў А.Лукашэнка рытарычнае пытанне і падвёў: "Ніякай перспектывы!".
Пра «паўзучую контррэвалюцыю»
"Паўзучая контррэвалюцыя ў Беларусі не пройдзе", заявіў Лукашэнка, нагадаўшы, як "па мардасах тут панадавалі каляровым рэвалюцыям".
Звяртаючыся "да некаторых нашых і замежных палітыкаў", дыктатар асцярог ад планаў, "лібералізуючы грамадскія працэсы, паволі ствараць умовы для замены існуючага ладу і, прасцей кажучы, звяржэння Лукашэнкі".
"Любая ўлада толькі тады чагосьці вартая, калі ўмее абараніцца і абараніць свой народ. Я як кіраўнік дзяржавы буду рабіць усё, каб абараніць не сваю ўладу, а ўладу народа, які паставіў мяне тут", заявіў А.Лукашэнка.
У крызіс працаваць суткамі, не спаць і не есць, каб захаваць вытворчасць
Працаваць суткамі і не адносіцца да дзяржавы як да сабеса заклікаў Аляксандр Лукашэнка.
"Я катэгарычныя не прымаю скарачэння працоўных месцаў і выкідання людзей на вуліцы. Мы хочам захаваць вытворчасць і пакінуць кожнага чалавека працаваць ля станка на гэтай вытворчасці", заявіў кіраўнік дзяржавы.
Пры гэтым ён падкрэсліў, што "народ павінен разумець: калі мы пайшлі гэтым шляхам, значыць трэба прыходзіць на працу і працаваць суткамі, не спаць і не есць, але захаваць вытворчасць". Тады, па словах кіраўніка дзяржавы, у "посткрызісны перыяд людзі будуць занятыя, мы не страцім кадры".
"Мне ўсё часцей прыходзіць інфармацыя, што людзі гатовыя жыць у Беларусі як у сабесе. Беларусь - не інстытут сацыяльнага забеспячэння, калі хачу - працую, хачу - не. Так не будзе", заявіў А.Лукашэнка, падкрэсліўшы, што ім дадзеныя "указанні на месцах самым жорсткім чынам перарываць падобныя настроі".
Працаваць у страту і на склад – злачынна
Аляксандр Лукашэнка называе злачыннымі стратны экспарт і працу "на склад".
"Я спакойна глядзеў на канец мінулага года і першы квартал бягучага года, калі кіраўнікі і міністры дакладалі, што вельмі складана сёння па такім-та кошце прадаць", таму "такімі-сякімі таварамі ў наменклатуры прадпрыемствам прыходзіцца гандляваць у страту", - сказаў ён. "Я гэта прапускаў па-за вушамі і ўсіх папярэджваў - мы трываем квартал. З 1 красавіка ў страту працаваць злачынна", - падкрэсліў ён.
"Праца ў страту - гэта заўтрашняя катастрофа", - заявіў беларускі кіраўнік. "Тое ж датычыцца і працы на склад", - дадаў ён.
На прыватны бізнэс перакладуць «частку цяжару»
Аляксандр Лукашэнка патрабуе развязаць рукі прыватнаму бізнэсу, асабліва ў сферы паслуг.
"Пусціце прыватны бізнэс, развяжыце яму рукі", сказаў Лукашэнка. Пры гэтым ён падкрэсліў, што ўсё ў стане зрабіць мясцовыя ўлады.
Па меркаванні кіраўніка дзяржавы, "мэтазгодна перакласці частку цяжару з індустрыі на іншыя сектары эканомікі, сур'езна заняцца сектарам паслуг". А.Лукашэнка падкрэсліў, што транспартныя, банкаўскія, лізінгавыя, адукацыйныя і іншыя паслугі маюць велізарны патэнцыял, асабліва ў малых і сярэдніх гарадах.
Акрамя таго, Лукашэнка заклікаў актыўней развіваць культурны турызм. "5 тысяч помнікаў у невялікіх населеных пунктах. Але мала гасцініц, кемпінгаў, кафэ", лічыць кіраўнік дзяржавы. Па ягоным меркаванні, неабавязкова захапляцца мегапраектамі кшталту Аўгустоўскага канала, трэба развіваць малабюджэтны сельскі турызм, аграсядзібы.
А.Лукашэнка выказаўся за стварэнне транспартных лагістычных цэнтраў, у тым ліку і бізнэсавіяцыі. А звяртаючыся да кіраўніка Дзяржаўнага мытнага камітэта, папрасіў "адносіцца да тых, хто перасякае мяжу, як да самых дарагіх гасцей".
"Задзейнічаць канкурэнтныя перавагі Беларусі для пераходу да інавацыйнай эканомікі. Прасоваць ідэю стварэння венчурных кампаній, распрацоўваць умовы страхавання інавацыйнай дзейнасці", дадаў А.Лукашэнка.
Лукашэнка зноў запэўнівае, што папярэджваў аб дэвальвацыі
Праведзеная ў пачатку года разавая дэвальвацыя беларускага рубля была аб'ектыўна неабходная, лічыць Аляксандр Лукашэнка.
"МВФ гатовы быў падтрымаць нас крэдытам пад дэвальвацыю на 10%, нават не на 20%", - заявіў ён.
Аднак, "Расея да таго часу дэвальвавала сваю валюту на 50%, і да мяне валам павалілі кіраўнікі прадпрыемстваў, урады - мы абвалім прадпрыемствы", - нагадаў беларускі кіраўнік. Па ягоных словах, розныя ўзроўні дэвальвацыі нацвалют у Беларусі і ў краінах, якія з'яўляюцца асноўнымі гандлёвымі партнёрамі, прывялі б да "каласальных страт у вытворчасці". Таму і было прынятае рашэнне знізіць курс беларускага рубля на 20%, растлумачыў ён. Пры гэтым А.Лукашэнка канстатаваў, што дэвальвацыя ў Беларусі па сваіх памерах "усё роўна адставала ад дэвальвацыі ў Расеі і Ўкраіне - гэта яшчэ было зроблена паўкрокі". Але "дэвальвацыя дапамагла ўтрымацца на плаву прадпрыемствам. Самае галоўнае - любым коштам захаваць вытворчасць", - лічыць дыктатар.
Па ягоным меркаванні, "мы прайшлі дэвальвацыю адносна бязбольна ў параўнанні з іншымі краінамі".
Пры гэтым А.Лукашэнка аспрэчвае абвінавачванні ў свой адрас з нагоды таго, што разавая дэвальвацыя была праведзеная без папярэджання. "За гэта ўчапіліся ўсялякія шарлатаны, апазіцыянеры, ды і проста некаторыя людзі, маўляў, вось - нас абдурылі", - адзначыў ён. Кіраўнік дзяржавы нагадаў, што ў канцы снежня 2008 года ў тэлеінтэрв'ю "я нават сказаў, што калі і будзе дэвальвацыя - прыкладна, на 10% або каля гэтага, то гэта не страшна для нас". Ён таксама нагадаў, што па выніках 2008 года раней запланаваны ўзровень дэвальвацыі (на 2,5%) быў забяспечаны, і гэта адпавядае зробленым ім раней абяцанням. "Мы не пайшлі ў 2008 годзе на дэвальвацыю, хоць і павінныя былі б", - адзначыў ён.
А.Лукашэнка лічыць, што "зараз няма падставы для панічных настрояў - бегчы закупаць прадукты, тавары і валюту, і я гэта казаў яшчэ ў пачатку года". "Ніхто не будзе падлашчвацца або, тым больш, падманваць народ, які мяне абраў прэзідэнтам", - падкрэсліў ён.
У той жа час ён заклікаў да адказнасці асоб, якія сеюць панічныя настроі. "Тыя, хто спекулюе, - гэта папулісты, і яны павінныя несці адказнасць за гэта", - заявіў кіраўнік.
Дырэктары прадпрыемстваў павінныя працаваць «сціснуўшы зубы»
"Мы будзем на корані перарываць спробы ўтрыманскіх настрояў у гаспадарчых суб'ектаў", - заявіў ён.
"Кіраўнікі прадпрыемстваў не павінныя думаць па-старому. Вельмі памыляюцца тыя з іх, якія хацелі б скарыстацца момантам і прыкрыць сваю безгаспадарлівасць за кошт дзяржавы", - падкрэсліў Лукашэнка.
"Дзяржава падтрымае тыя прадпрыемствы, якія не зпасавалі перад знешнімі складанасцямі, спрабуюць заняць новыя пазіцыі на ўнутраным і знешнім рынках", - сказаў ён.
У якасці прыкладу ён прывёў шэраг прадпрыемстваў нафтахімічнага комплексу, якія, патрапіўшы ў складаную сітуацыю ў перыяд крызісу, па словах прэзідэнта, "сціснуўшы зубы, нават без значнай падтрымкі дзяржавы сёння ажылі". Ён растлумачыў, што яны "гандлююць так, як гэтага патрабуе спажывец".
А.Лукашэнка заўважыў, што не варта чакаць таго, што спажывец сам прыйдзе на завод і купіць прадукцыю оптам. "Можа быць, прыйдзецца прадаваць па гарбатнай лыжцы", - сказаў ён. Пры гэтым ён заўважыў, што як толькі прадстаўнікі прадпрыемстваў "раз'ехаліся па краінах далей за Расею, высвятлілася, што беларуская прадукцыя запатрабаваная там і па якасці, і па кошце".
Кіраўнік дзяржавы таксама заклікаў урад і губернатараў прымаць рашэнне "не седзячы ў сваіх цёплых кабінетах, а трымаючы руку на пульсе канкрэтных суб'ектаў гаспадарання".
Гэта хто ж шыкуе за дзяржаўны кошт?
"Барацьба з карупцыяй будзе весціся бязлітасна", - заявіў А.Лукашэнка.
Па ягоных словах, "апошняя амністыя паказвае, што карупцыянеры могуць не марыць аб ласцы".
Ён падкрэсліў, што факты карупцыі хоць і могуць часам быць утоеныя ад праваахоўных органаў, ніколі не з'яўляюцца таямніцай для звычайных грамадзян. "Калі кіраўнік на руку нячысты, то вельмі хутка гэта становіцца вядомым для ўсіх навакольных", - заўважыў ён.
А.Лукашэнка таксама асцярог прадстаўнікоў кіруючай вертыкалі ад праяваў "панства". "Некаторыя кіраўнікі імкнуцца шыкануць за дзяржаўны кошт. Арганізацыі ў даўгах, як у шаўках, а яны купляюць дарагія аўтамабілі, робяць шыкоўныя рамонты ў службовых кабінетах. Такія панскія замашкі выклікаюць асаблівае абурэнне людзей, асабліва на фоне нашых заклікаў да эканоміі", - сказаў кіраўнік дзяржавы.
Лібералізацыя – не ўседазволенасць
Лукашэнка настойвае на тым, каб абвешчаную ў краіне лібералізацыю эканомікі не ўспрымалі як уседазволенасць.
"Шматлікія, як толькі мы абвясцілі аб лібералізацыі эканомікі, зразумелі гэта як уседазволенасць. А яе трэба ўспрымаць як стваральную ініцыятыву, а не як шлях да лёгкай нажывы", заявіў ён.
"Лібералізацыя - не адзінамомантавы акт. Яна не зводзіцца толькі да прыватызацыі і распродажу зямлі. Гэта планамерны працэс, накіраваны ў першую чаргу на вызваленне справавой актыўнасці", адзначыў беларускі кіраўнік.
"Мы кажам аб эканамічнай лібералізацыі, каб не перашкаджалі тым, хто хоча працаваць. А некаторыя адшчапенцы і адмарозкі гэта зразумелі так - што хачу, тое і кручу".
«Я цалкам у нармальных кандыцыях…»
Кажучы аб тым, ці здзяйсняе на яго ўплыў новая каманда або сям'я, ён сказаў: "Некаторыя разважаюць так: прыйшла да прэзідэнта нейкая новая каманда, я не буду называць прозвішчы, іх добра ведаюць, аж да маіх сыноў, і яны нібыта ўплываюць на прэзідэнта, яны паварочваюць кола гісторыі Беларусі ў бок Захаду ад Расеі, лібералізацыі і гэтак далей: Супакойцеся, я яшчэ ў стане фарміраваць палітыку ўнутры дзяржавы і за яе межамі", - сказаў А.Лукашэнка ў Менску ў штогадовым пасланні народу і парламенту.
"Я яшчэ ў стане рэалізаваць шматвектарнасць нашай знешняй палітыкі", - заявіў Лукашэнка.
"Яшчэ раз сапраўды і шчыра кажу - не памыляйцеся, што нейкія групоўкі з'явіліся вакол прэзідэнта і ціснуць на яго, уплываюць - ідзі на Захад - іду туды - ідзі сюды", падкрэсліў кіраўнік дзяржавы.
"Мы ідзем туды, дзе нас чакаюць, дзе ёсць нашыя нацыянальныя інтэрасы. Супакойцеся, прэзідэнт цалкам у нармальных кандыцыях і гатовы, і будзе прымаць рашэнні ў межах Канстытуцыі", сказаў А.Лукашэнка.
Лукашэнка назваў хамствам заяву прэзідэнта Чэхіі
Аляксандр Лукашэнка лічыць хамствам заяву "высокапастаўленага чыноўніка Чэхіі" аб тым, што той "не падасць рукі Лукашэнку".
"Я нядаўна са СМІ пачуў ад аднаго высокапастаўленага чыноўніка Чэхіі: "я яму не падам рукі". Ну, не падасі і не трэба. Хамства не трэба, яно не на карысць у адносінах паміж дзяржавамі", - заявіў дыктатар.
Беларускі кіраўнік заклікаў прымаючы бок на саміце Еўразвяза "Ўсходняе партнёрства" вызначыцца з фармулёўкамі і канкрэтызаваць сваю пазіцыю. "Калі вам няёмка будзе, што ў Празе хоць адзін чалавек з Беларусі будзе, тады не трэба нас запрашаць. Мы патрываем, калі вам няёмка або невыгодна будзе", - сказаў А.Лукашэнка. "Зрабіце, як вам зручна. Калі зручна, каб не Лукашэнка, а іншы чалавек радстаўляў Беларусь - скажыце аб гэтым прама", - дадаў ён. "Я чалавек адкрыты, давайце казаць адкрыта, хай непублічна, і я вас зразумею", - сказаў беларускі кіраўнік, звяртаючыся да арганізатараў саміту "Ўсходняе партнёрства".
"Мы сказалі "так" "Усходняму партнёрству". Гэта выгодна Беларусі і беларускага народа. Гэта не дзеля Лукашэнкі. Дзеля таго, што выгодна Беларусі, я стрываю ўсё, нягледзячы на мой амбіцыйны або нейкі там яшчэ характар. Для мяне гэта галоўнае", - падкрэсліў беларускі кіраўнік і дадаў, што "гандлявацца мы не будзем".
Як паведамлялася раней, прэс-сакратар прэзідэнта Чэхіі Радзім Ахоп заявіў, што прэзідэнт старшынюючай у ЕЗ Чэхіі Вацлаў Клаўс "не падасць рукі Лукашэнку" і не запросіць яго ў сваю рэзідэнцыю "Пражскі Град", калі той прыедзе ў Прагу на саміт праграмы Еўразвяза "Ўсходняе партнёрства", які адбудзецца 7 мая 2009 года.
Афіцыйнае запрашэнне прыехаць на саміт А.Лукашэнку 17 красавіка перадаў кіраўнік МЗС Чэхіі Карэл Шварцэнберг.
Расейскі напрамак – прыярытэтны
Аляксандр Лукашэнка пацвярджае стратэгічную значнасць супрацоўніцтва з Расеяй для Беларусі.
"Стратэгічнае значэння для нас мае супрацоўніцтва з Расейскай Федэрацыяй і саюзнае будаўніцтва з ёй", - сказаў А.Лукашэнка.
Беларускі кіраўнік назваў "уражлівым" эфект ад узаемадзеяння краін. "Таваразварот амаль $35 млрд летась, найшырэйшы спектр галін супрацоўніцтва, інтэнсіўны і зацікаўлены дыялог на ўсіх узроўнях", - заўважыў ён.
Лукашэнка звярнуў увагу на тое, што прынятыя падчас апошняга паседжання Вышэйшага Дзяржсавета «саюзнай дзяржавы» рашэнні "фарміруюць стратэгічную лінію двухбаковага ўзаемадзеяння", дадаўшы, што "адмысловую значнасць набываюць сумесныя антыкрызісныя праграмы".
"Зараз галоўнае - стала працаваць над якасным станам інтэграцыйнага ўзаемадзеяння, цалкам безумоўна рэалізаваць усе вызначаныя раней планы", - дадаў ён.
Падчас пасланняў А.Лукашэнка таксама паставіў задачу захаваць высокі ўзровень узаемадзеяння ў межах ЕўрАзЭС, АДКБ і СНД.
"Праз некалькі месяцаў да Беларусі пяройдуць функцыі старшыні ў статутных органах АДКБ", - нагадаў ён. "Ва ўмовах эрозіі сістэмы еўрапейскай глабальнай бяспекі, якая працягваецца, ставіцца задача ў больш поўным аб'ёме выкарыстаць наяўны ў гэтай арганізацыі патэнцыял", - заўважыў А.Лукашэнка.
А.Лукашэнка таксама сказаў, што для краіны застаецца прыярытэтным накірункам удзел у Руху недалучэння.
Ён таксама лічыць, што падвышэнню міжнароднага аўтарытэту Беларусі будзе спрыяць усталяванне цесных узаемаадносінаў з Шанхайскай арганізацыяй супрацоўніцтва (ШАС) і "у перспектыве атрыманне Беларуссю статусу краіны-партнёра ШАС".
Беларусь сама зробіць «Іскандэры»
Аляксандр Лукашэнка здзіўляецца ў сувязі са з'яўленнем у расейскіх СМІ прапановаў спыніць пастаўкі зброі ў Беларусь у сувязі ейнага збліжэння з Захадам.
"Калі былі складаныя адносіны з Захадам, у Расеі ўсе былі за Беларусь. Сёння ў паважаных выданнях, якія чытаюць і расейскія кіраўнікі, заяўляюць: ці варта пастаўляць у Беларусь такую зброю як "Іскандэр", калі Лукашэнка змяніў вектар знешняй палітыкі", заявіў А.Лукашэнка.
"Мы ніколі не прасілі ў расейцаў Іскандэры. Мы іх самі купім. Але скажу прама, мы іх самі зробім, калі трэба, акрамя ракет, а ракеты купім", паабяцаў ён.
У той жа час кіраўнік падкрэсліў, што Беларусь не можа праводзіць палітыку супраць Расеі, бо Расею замяніць няма чым.
Па меркаванні беларускага кіраўніка, калі расейцы, таксама як беларусы, лічаць сябе адзіным народам, яны павінныя цешыцца поспехам Беларусі. Пры гэтым А.Лукашэнка падзякаваў за падтрымку ў Еўропе Ўкраіне, а таксама краінам Балтыі, Польшчы, Чэхіі.
Звяртаючыся да еўрапейскіх партнёраў, прэзідэнт выказаў неразуменне заявамі па пытанні прызнання Паўднёвай Асеціі і Абхазіі. "Маўляў, калі Беларусь прызнае Паўднёвую Асецію і Абхазію, мы яе пакараем. Так вы пакарайце Расею, яна ўжо прызнала", сказаў А.Лукашэнка, паабяцаўшы, што Беларусь выканае тое, што не аднойчы дэкларавала.
Беларускі кіраўнік папрасіў "і на Ўсходзе і на Захадзе супакоіцца і хоць на хвіліну зыходзіць з нашых унутраных інтэрасаў".
"Супакойцеся, дайце спакойна праводзіць палітыку, якая будзе цікавая і бясшкодная ўсім", паабяцаў ён.
Звяртаючыся да амбасадараў заходніх дзяржаў, Лукашэнка падкрэсліў, што, магчыма, "занадта аголена кажа, каб яны разумелі сутнасць палітыкі". "Не хачу, каб мяне пасля Пражскага саміту папракалі - казаў адно, робіць іншае. Мы хочам быць з Расеяй, хочам сябраваць з Еўропай", рэзюмаваў ён.
"Адзінае, чаго мы не патрываем, калі нас будуць панукаць, калі нас як быдла будуць пхаць у спіну", дадаў кіраўнік.
Дыктатар супраць свабоды слова
Аляксандр Лукашэнка ўпэўнены, калі беларускай апазіцыі даць свабоду ў СМІ, то ад яе "будуць кідацца, як ад праказы".
"Ад Лукашэнкі патрабуюць змяніць законы, зламаць выбарчую сістэму, разбурыць СМІ, аддаць іх апазіцыі. Але калі беларускую апазіцыю адчынена выпусціць у СМІ, то 90% насельніцтвы будзе кідацца ад яе, як ад праказы", заявіў дыктатар.
Адзначаючы, што Беларусь не прымае дыялогу з пазіцыі сілы, але выконвае свае абяцанні, беларускі кіраўнік, звяртаючыся да амбасадараў заходніх дзяржаў, якія традыцыйна прысутнічаюць у Авальнай зале на прэзідэнцкім пасланні, сказаў: "Беларусь выканала сваё абяцанне перад Захадам і не пушчае нелегальных мігрантаў з Усходу ў краіны Еўразвяза".
"Мы паставілі бар'ер на шляху нелегальным мігрантам у Заходнюю Еўропу. Мы жалезабетонна трымаем сваё слова", сказаў А.Лукашэнка. "Мы абяцалі гэта і мы зрабілі. Зараз нелегальныя мігранты, з якой бы мэтай яны не ішлі з Усходу на Захад, абыходзяць Беларусь бокам", падкрэсліў беларускі кіраўнік.
"Мы захоўваем стабільнасць еўрапейскага сэрца і хочам, каб тут было спакойна і нармальна", адзначыў кіраўнік дзяржавы.
"Можа, не сёння - заўтра вы гэта зразумееце і скажаце нам дзякуй", сказаў ён.
Рэжым баіцца эканамічных санкцый з боку ЗША
Аляксандр Лукашэнка разлічвае на аднаўленне канструктыўных адносінаў ЗША з прыходам новай амерыканскай адміністрацыі.
"Мы заўсёды заяўлялі аб зацікаўленасці ў нармалізацыі палітычных адносінаў з ЗША", - заявіў ён.
"Мы разлічваем на тое, што новая адміністрацыя ЗША усвядоміць бесперспектыўнасць гутаркі з намі з пазіцыі сілы і на мове санкцый", - падкрэсліў дыктатар.
Ён таксама лічыць узаемавыгадным і магчымым узнаўленне ў поўным аб'ёме гандлёва-эканамічных адносінаў, што дазволіць выйсці на ўзровень узаемнага гандлю, які, да ўвядзення санкцый з боку ЗША, набліжаўся да $1 млрд.
Як паведамлялася, у канцы 2007 года ЗША увялі абмежавальныя санкцыі ў адносінах прадпрыемстваў беларускага канцэрна "Белнафтахім" і ягоных даччыных прадпрыемстваў, у якіх частка канцэрна складае 50% і больш.
Санкцыі прадугледжвалі фактычную замарозку актываў кампаній і забарону на гандлёва-эканамічную дзейнасць на тэрыторыі ЗША.
Пасля выбараў у Беларусі ў верасні 2008 года ЗША увялі часовы мараторый на гэтыя санкцыі. Мараторый дзейнічае да 1 чэрвеня 2009 года.