Сідорскі абвінаваціў Расею ў невыкананні антыкрызісных абавязанняў

• 7.04.2009, 9:32

Прэм'ер-міністр Беларусі паскардзіўся Аляксандру Лукашэнке на тое, што Расея дагэтуль не прыняла рашэння, каб забяспечыць роўныя ўмовы доступу да мер дзяржпадтрымкі.

У прыватнасці, не занесеныя змены ў дакумент, якім былі ўведзеныя прэферэнцыйныя папраўкі для тавараў расейскага паходжання (прэферэнцыйная папраўка пры дзяржзакупках 15%), паведамілі ў прэс-службе беларускага кіраўніка.

Прэм'ер-міністр паведаміў, што па завяршэнні першага квартала ў Беларусі прынялі ўсе неабходныя рашэнні па ўзаемнай дзяржаўнай падтрымцы прадпрыемстваў у рэальным сектары эканомікі.

Ён нагадаў, што ў адпаведнасці з падпісаным антыкрызісным планам сумесных дзеянняў урадаў Расейскай Федэрацыі і Беларусі вызначаныя тэрміны прыняцця канкрэтных рашэнняў па ўзаемнай дзяржпадтрымцы, а таксама рашэнні, датычныя дзяржаўных закупак, аб допуску беларускіх вытворцаў да дзяржзакупак у Расеі, і аднаўленні лізінгавых паставак прадукцыі.

Па паведамленні прэс-службы, Аляксандр Лукашэнка «яшчэ раз падкрэсліў, што агульны доступ на ўнутраныя рынкі дзвюх краін павінен быць на роўных умовах для суб'ектаў гаспадарання. У сувязі з гэтым ураду Беларусі было даручана актывізаваць працу з урадам Расейскай Федэрацыі па скарэйшым дасягненні ўзаемавыгадных рашэнняў па тых дамовах, якія былі выпрацаваныя на лютаўскім паседжанні Вышэйшага Дзяржаўнага Савета».

«Вынікі першага квартала бягучага года паказваюць наяўнасць цяжкасцяў з рэалізацыяй беларускай прадукцыі на традыцыйных для яе таварных рынках. У сувязі з гэтым, урад прапаноўвае падтрымаць айчынны прамысловы сектар. А менавіта, занесены шэраг прапановаў па набыцці тэхнікі на беларускім рынку, перш за ўсё, за кошт інавацыйных фондаў міністэрстваў, аблвыканкамаў, таксама па пастаўках сельскагаспадарчай тэхнікі для правядзення ўборачных прац», - адзначылі у прэс-службе Лукашэнка.