Карныя сілы для абароны дыктатараў могуць быць створаныя да 14 чэрвеня
- 18.05.2009, 22:20
АДКБ зможа рэагаваць на любыя «крызісныя сітуацыі», якія могуць паўстаць на тэрыторыі любой дзяржавы-ўдзельніцы арганізацыі.
18 мая генсакратар Арганізацыі Дамовы аб калектыўнай бяспецы Мікалай Бардзюжа паведаміў, што на саміце кіраўнікоў дзяржаў-удзельніц АДКБ у чэрвені будуць створаныя Калектыўныя сілы аператыўнага рэагавання і зацверджаны іхні склад.
«Самым галоўным пытаннем стане стварэнне Калектыўных сіл хуткага рэагавання. Падрыхтаваныя адпаведныя нарматыўныя акты, якія рэгламентуюць дзейнасць сіл аператыўнага рэагавання. Мы мяркуем, што 14 чэрвеня будзе зацверджаны склад КСАР», - адзначыў Бардзюжа журналістам у Менску пасля сваёй сустрэчы з Аляксандрам Лукашэнкай.
Па словах генсака АДКБ, «мяркуецца, што ў склад КСАР будуць уваходзіць вайсковыя фармаванні, а гэта, як правіла, брыгады спецпрызначэння ад дзяржаў-удзельніцы АДКБ. Акрамя таго, у КСАР будуць прадстаўленыя сілы спецпрызначэння ад органаў бяспекі, органаў унутраных спраў і міністэрстваў па надзвычайных сітуацыях».
Па словах Бардзюжы, «у выпадку стварэння такіх сіл Арганізацыя зможа рэагаваць на любыя катэгорыі крызісных сітуацый, якія могуць паўстаць на тэрыторыі любой дзяржавы-ўдзельніцы АДКБ і рэальна абараняць суверэнітэт і тэрытарыяльную цэласнасць дзяржаў, што ўваходзяць у Арганізацыю».
Падчас сустрэч з кіраўніком беларускай дзяржавы, Бардзюжа праінфармаваў таксама аб іншых пытаннях, якія выносяцца на паседжанне Савета калектыўнай бяспекі АДКБ, якое пройдзе ў Маскве.
«Мяркуецца, што 14 чэрвеня прэзідэнты збяруцца ў Маскве і разгледзяць таксама пытанні фармавання вайсковай пакідаючай Арганізацыі, каардынацыі знешнепалітычнай дзейнасці, узаемадзеянні АДКБ з некаторымі міжнароднымі структурамі», - сказаў генсак АДКБ.
Бардзюжа адзначыў, што на маючым адбыцца паседжанні старшынства ў АДКБ пяройдзе да Беларусі. «Вядома, мы спадзяемся, што гэты перыяд будзе традыцыйна актыўным, таму што калі Беларусь бярэ на сябе старшынства, шматкроць павялічваецца актыўнасць статутных органаў АДКБ, з'яўляецца вельмі шмат цікавых праектаў і ініцыятыў», - сказаў М.Бардзюжа. Ён выказаў надзею, што «і ў гэты раз мы выйдзем на шэраг канкрэтных прыярытэтных накірункаў супрацоўніцтва і ініцыятыў. Гэтыя ініцыятывы Беларусі будуць агучаныя на сустрэчы кіраўнікоў дзяржаў -удзельніц АДКБ 14 чэрвеня», - заявіў генеральны сакратар АДКБ.
Аляксандр Лукашэнка на сустрэчы з Мікалаем Бардзюжам у сваю чаргу заявіў, што Беларусь актывізуе супрацоўніцтва ў межах Арганізацыі Дамовы аб калектыўнай бяспецы ў перыяд свайго старшынства ў АДКБ.
«Мы гатовыя вельмі актыўна супрацоўнічаць у межах АДКБ - настолькі, наколькі да гэтага гатовыя нашы партнёры. Мы выступаем за тое, каб было больш справы, чым словаў», - адзначыў беларускі кіраўнік.
Па словах Лукашэнкі, «свет спакойным не становіцца, асабліва ў сувязі з гэтым крызісам». «Таму бяспека кожнай дзяржавы ў асобнасці і калектыўная бяспека - найважныя фактары», - сказаў беларускі дыктатар. Па ягоных словах, «у адзіночку сёння вельмі складана забяспечыць бяспеку нават вялікім дзяржавам». «Калі ў нас цеснае супрацоўніцтва ўнутры АДКБ, то кожны будзе сябе адчуваць спакайней», - заявіў ён.
Лукашэнка нагадаў, што чарговая сесія Савета аб калектыўнай бяспецы АДКБ пройдзе 14 чэрвеня ў Маскве, пасля якой старшынства ў Арганізацыі пяройдзе да Беларусі. «У перыяд старшынства Беларусі ў АДКБ заўсёды адбывалася актывізацыі дзейнасці. Вядома, мы хацелі, каб гэтая актывізацыя адбылася ў перыяд чарговага старшынства», - адзначыў беларускі кіраўнік.
Нагадаем, што раней апазіцыйныя лідэры Беларусі асуджалі падпісанне дамовы аб стварэнні КСАР АДКБ, і называлі іх карнымі сіламі, якія будуць абараняць дыктатараў СНД. Стварэнне гэтых сіл супярэчаць нейтральнаму статусу Беларусі і Канстытуцыі Рэспублікі Беларусь.
Відавочна, што дыктатарскія рэжымы СНД асцерагаюцца народных выступаў, звязаных з іх правальнай эканамічнай палітыкай ва ўмовах крызісу. Звярніце ўвагу, наколькі цьмяныя фармулёўкі Мікалая Бардзюжы – падобна, што так званыя калектыўныя сілы аператыўнага рэагавання змогуць быць уведзеныя ў любую краіну ў любы час.