У Беларусі створаная Асацыяцыя палітвязняў

• 22.05.2009, 11:41

Шэраг вядомых беларускіх грамадскіх і палітычных дзеячаў супрацьстаяць палітычным рэпрэсіям улад.

Аб гэтым заявіў экс-кандыдат у прэзідэнты Беларусі, былы палітычны зняволены Аляксандр Казулін, паведамляе kozylin.com.

Казулін паведаміў аб стварэнні новага аб'яднання падчас прыёму па выпадку 55-годдзія «Радыё Свабода» і прэзентацыі кнігі «Адзін дзень палітвязня», створанай журналістамі гэтай радыёстанцыі. За стварэнне Асацыяцыі прагаласавалі шматлікія вядомыя ў Беларусі людзі, якія ў розныя гады пасля прыходу да ўлады Аляксандра Лукашэнкі знаходзіліся ў месцах пазбаўлення волі і шматлікія з якіх, як і Аляксандр Казулін, былі прызнаныя міжнароднымі праваабарончымі арганізацыямі «вязнямі сумлення».

«Зараз улады рыхтуюць новы закон, які дасць сілавым структурам - КДБ, Міністэрству ўнутраных спраў, Камітэту дзяржкантролю новыя магчымасці па затрыманні нашых грамадзян без санкцыі пракурора. І мы выдатна разумеем, што палітычныя рэпрэсіі будуць працягвацца, таму стварэнне Асацыяцыі палітычных зняволеных з'яўляецца вельмі важным, паколькі вельмі важна, каб голас палітвязняў, у тым ліку і тых, хто зараз знаходзіцца за кратамі (Ваўкавыскія прадпрымальнікі Мікалай Аўтуховіч і Юрый Лявонаў, а таксама былы афіцэр Уладзімір Асіпенка), быў пачуты ва ўсім свеце», - сказаў Аляксандр Казулін.

Сярод тых, хто ўвайшоў у Асацыяцыю палітычных зняволеных, - экс-кіраўнік беларускага ўрада Міхаіл Чыгір, былы міністр сельскай гаспадаркі Васіль Лявонаў, журналіст і былы дэпутат парламента Мікалай Маркевіч, моладзевыя актывісты Андрэй Кім і Артур Фінькевіч, палітыкі Вячаслаў Сіўчык, Юрый Хадыко, Віктар Івашкевіч, праваабаронцы Валер Шчукін, Кацярына Садоўская, былы мэр Менска і экс-міністр знешэканамразвіцця, надзвычайны і паўнаважаны амбасадар Міхаіл Марыніч і іншыя вядомыя ў Беларусі і за яе межамі людзі.