Васілевіч абяцае «пашукаць» дакументы Зэльцэра для амністыі

• 23.06.2009, 12:31

Генеральная пракуратура Беларусі мае намер высвятліць сітуацыю, якая склалася з дакументамі, неабходнымі для пачатку ўжывання амністыі да грамадзяніна ЗША Эмануіла Зэльцэра.

«Мы высвятлім прычыны», заявіў на прэс-канферэнцыі ў Менску генеральны пракурор Беларусі Рыгор Васілевіч, адказваючы на пытанне журналістаў аб тым, чаму Менскі гарадскі суд не прадастаўляе ў адміністрацыю калоніі дакументы аб прысудзе Э.Зэльцэру. Пры гэтым генпракурор сказаў: «Па-мойму, тэрміны прадастаўлення дакументаў ужо падыйшлі».

Нагадаем, што грамадзянін ЗША Эмануіл Зэльцэр абвясціў галадоўку пратэсту 8 чэрвеня. Такім чынам амерыканскі юрыст спрабуе прыцягнуць увагу да факту неабгрунтаванага зацягвання выдачы Менскім гарадскім судом даведкі, без якой адміністрацыя калоніі не можа разгледзець пытанне аб ужыванні да яго амністыі.

11 чэрвеня адвакат накіраваў у Вярхоўны суд і Генеральную пракуратуру Беларусі скаргу на дзеянні Мінгарсуда.

Зэльцэр трапляе пад дзеянне закона аб амністыі, падпісанага прэзідэнтам Беларусі 5 мая. Паводле артыкула 22 гэтага закона арганізацыя мае права запытваць дакументы перад разглядам пытання аб магчымасці ўжыць амністыю. Пры гэтым запытаныя дакументы павінныя быць прадастаўленыя неадкладна. Аднак на працягу вось ужо трох тыдняў магілёўская калонія № 15, дзе ўтрымоўваецца Зэльцэр, не можа атрымаць дакумент з Менгарсуда.

11 жніўня 2008 года Менскі гарсуд прысудзіў Зэльцэра да трох год пазбаўлення волі. Амерыканскі юрыст прызнаны вінаватым у выкарыстанні загадзя ілжывых дакументаў і замаху на камерцыйны шпіянаж. Суд праходзіў у закрытым рэжыме. З моманту прыбыцця ў магілёўскую калонію Зэльцэр знаходзіцца ў бальнічным аддзяленні ў сувязі з дрэнным станам здароўя.