Актывісты «Еўрапейскай Беларусі» пікетавалі СІЗА на Валадарскага (Фота)
- 12.08.2009, 16:49
Увечары 11 жніўня ў Менску прайшла акцыя салідарнасці з апазіцыянерамі, якія знаходзяцца ў беларускіх турмах.
Актывісты грамадзянскай кампаніі «Еўрапейская Беларусь» правялі пікет ля сценаў следчага ізалятара №1 ГУУС Менгарвыканкама, дзе ў цяперашні час знаходзяцца ваўкавыскія прадпрымальнікі Мікалай Аўтуховіч і Уладзімір Асіпенка.
Моладзевыя актывісты сталі ў ланцужок насупраць уваходу ў турму і разгарнулі расцяжку «Свабоду палітвязням». Як паведамляе сайт jeans-by.com, у руках маладыя людзі трымалі партрэты Мікалая Аўтуховіча, Уладзіміра Асіпенкі і ўдзельніка «Працэсу 14-ці», арыштаванага актывіста «Маладога фронту» Арцёма Дубскага.
Адзін з удзельнікаў акцыі праз мегафон зачытаў патрабаванне аб вызваленні палітычных вязняў і спыненні палітычна матываваных рэпрэсіяў. Пасля гэтага моладзевыя актывісты пачалі гучна скандаваць «Свабоду палітвязням!», «Свабоду Аўтуховічу!», «Свабоду Асіпенку!», «Свабоду Дубскаму!»
У акцыі таксама прыняў удзел лідэр Аб'яднанай грамадзянскай партыі Анатоль Лябедзька.
Пікет працягнуўся 15 хвілінаў, ніхто з яго ўдзельнікаў не быў затрыманы.
Нагадаем, што Мікалай Аўтуховіч, Юры Лявонаў і Уладзімір Асіпенка былі затрыманыя 8 лютага. 18 лютага прадпрымальнікам было прад'яўлена абвінавачванне па арт. 218 Крымінальнага кодэкса (наўмыснае знішчэнне альбо пашкоджанне маёмасці). 23 чэрвеня ў дачыненні да Аўтуховіча і, як паведаміла МУС, «іншых асобаў» узбуджаная справа па арт. 359 КК (тэрарыстычны акт) у выглядзе падрыхтоўкі (арт. 13).
Праваабаронцы лічаць затрыманых палітычнымі зняволенымі, звяртаючы ўвагу на тое, што Аўтуховіч і Лявонаў раней ужо былі асуджаныя і прызнаныя міжнароднай супольнасцю вязнямі сумлення.
Ваўкавыскага прадпрымальніка Юрыя Лявонава вызвалілі з менскага следчага ізалятара 8 жніўня. У дачыненні да яго спыненыя следчыя дзеянні. Як чакаецца, судовы працэс па справе ваўкавыскіх прадпрымальнікаў можа пачацца ў лістападзе.
Арцём Дубскі 7 ліпеня 2009 года быў прысуджаны да года пазбаўлення волі ў калоніі агульнага рэжыму за парушэнне правілаў адбыцця пакарання па «справе 14-ці».
«Справа 14-ці» – справа па арт. 342 Крымінальнага кодэкса Рэспублікі Беларусь, узбуджаная ў дачыненні да ўдзельнікаў мірнай акцыі пратэсту прадпрымальнікаў, якая прайшла ў Менску 10 студзеня 2008 года.
За ўдзел у гэтай акцыі 14 моладзевых актывістаў былі прысуджаныя да розных тэрмінаў пазбаўлення і абмежавання волі. Міжнародная праваабарончая арганізацыя «Amnesty International» у 2009 годзе прызнала ўдзельнікаў «Працэсу 14-ці» Вязнямі сумлення.