У рэгіёнах звальняюць актывістаў незалежных прафсаюзаў

• 31.08.2009, 11:14

У Берасцейскім дзяржаўным універсітэце да пачатку навучальнага года спяшаюцца пазбавіцца ад Свабоднага прафсаюза Беларускага.

Як паведамляе «Еўрарадыё», выкладчык музыкі Алег Галенка адмовіўся выходзіць з прафсаюза.

«Мяне выклікаў рэктар, альбо выходзіце з прафсаюза, і мы супрацоўнічаем, альбо мы не супрацоўнічаем, -- распавядае Алег Галенка. – Таму заўтра я іду на працу і пішу заяву аб звальненні. Я сам прыняў такое рашэнне. Гэта не таму, што яны не хочуць са мной супрацоўнічаць. Гэта я не хачу з імі супрацоўнічаць».

Раней ва ўніверсітэце было больш за сто чальцоў СПБ. Зараз засталося восем, да і тых у розны час пазбавілі працы ва ўніверсітэце.