Google гатовы закрыць офісы ў Кітаі

• 13.01.2010, 9:56

Кітай можа застацца без самага папулярнага інтэрнэт-пашукавіка ў свеце.

Google Inc. гатовы закрыць свае офісы і сайт у краіне пасля «вельмі дасканалай» хакерскай атакі на паштовы сервіс кампаніі, паведаміла агенцтва Bloomberg.

У снежні мінулага года хакеры паспрабавалі атрымаць доступ да паштовых скрыняў праваабаронцаў у Кітаі, Еўропе і ЗША. Першапачаткова лічылася, што напад - справа рук іранскіх кібертэрарыстаў, але пасля ўважлівага расследавання супрацоўнікі Google прыйшлі да высновы, што атака была праведзена з Кітая, перадае «Інтэрфакс».

Google мае намер адмовіцца ад цэнзуры вынікаў пашукавіка, якая з'яўляецца абавязковай умовай урада Кітая, і правесці перамовы з кітайскімі ўладамі аб далейшых дзеяннях. У прыватнасці, адным з наступстваў можа стаць закрыццё сайта Google.cn і ўсіх офісаў у Кітаі, адзначаецца ў заяве Google.

Чатыры гады таму ў Google ужо былі спрэчкі з кітайскімі ўладамі: кампанія тады запускала свой сайт у краіне, і ўрад КНР хацеў бачыць толькі вынікі, якія прайшлі цэнзуру.

Міністэрства прамысловасці і інфармацыйных тэхналогій і МЗС КНР адмовіліся пракаментаваць сітуацыю.

Колькасць карыстальнікаў Інтэрнэту ў Кітаі перавышае ўсе насельніцтва ЗША, паводле дадзеных урадавых арганізацый КНР.

Пасля заявы Google аб магчымым сыходзе з Кітая яе акцыі патаннелі на 1,9% у ходзе электронных таргоў.