«Інтэр РАТ ЕЭС»: Нас пачынаюць шантажаваць
- 4.01.2010, 17:14
Расейскі аператар экспарту-імпарту электраэнергіі лічыць недапушчальнымі пагрозы Беларусі па абмежавання транзіту энергіі ў Калінінградскую вобласць.
Пра гэта «Інтэрфаксу» заявіў прадстаўнік кампаніі ААТ «Інтэр РАТ ЕЭС» Барыс Звераў.
«Беларускі бок напярэдадні новага года ў парушэнне (раней дасягнутых) дамоўленасцяў прапанаваў у 2,5 разы павялічыць кошт транзіту электраэнергіі (у Калінінград). Расейскі бок лічыць гэта непрымальным. Мы накіравалі Беларусі сустрэчную, камфортную для партнёраў прапанову, якая павінна абмяркоўвацца ў рамках чарговага раўнда перамоваў 11-12 студзеня», - сказаў ён.
«Адначасова беларускі бок пачынае фактычна шантажаваць Расею праз СМІ пагрозамі перашкодзіць энергазабеспячэнню Калінінградскай вобласці», - адзначыў Звераў.
«Мы лічым гэта недапушчальным. Перакананыя, што выкарыстанне СМІ ў якасці інструмента ціску ці шантажу абсалютна не адпавядае правілам вядзення перамоваў. Разлічваем, што мы здолеем вярнуць хаду абмеркавання гэтага пытання ў цывілізаванае рэчышча», - заключыў ён.
Нагадаем, што ДВА «Белэнерга» заяўляе пра магчымасць спынення транзіту электраэнергіі ў Калінінградскую вобласць.
«Да гэтага часу расейскія энергетычныя кампаніі ААТ «ФСК ЕЭС» і ААТ «Інтэр РАТ ЕЭС» не ўзгаднілі з беларускім бокам умовы транзіту электраэнергіі па тэрыторыі Беларусі для энергазабеспячэння спажыўцоў Калінінградскай вобласці і для камерцыйных паставак у краіны Балтыі. Тым не менш, расейскі бок такі транзіт ажыццяўляе, і па стане на 4 студзеня 2010 года аб'ём несанкцыянаванага транзіту склаў каля 39,5 млн квт/г», - сказана ў распаўсюджанай у панядзелак заяве РУП «АДУ», якое ўваходзіць у склад«Белэнэрга.
«Дадзеныя дзеянні расейскага боку вымушаюць беларускі бок разглядаць меры па спыненні несанкцыянаванага камерцыйнага перамяшчэння электраэнергіі праз сеткі беларускай энергасістэмы, што можа паставіць пад пагрозу надзейнае энергазабеспячэнне спажыўцоў Калінінградскай вобласці, у тым ліку насельніцтва», - сказана ў паведамленні.