МЗС Беларусі лічыць АБСЕ непаўнавартаснай арганізацыяй

• 26.11.2010, 10:04

Беларускі бок лічыць, што АБСЕ неабходна «адаптоўвацца да новых геапалітычных рэаліяў і абнавіць свой праграмны інструментар».

У распаўсюджанай 25 лістапада МЗС Беларусі заяве кажацца, што 1-2 снежня ў Астане пройдзе Саміт Арганізацыі па бяспецы і супрацоўніцтве ў Еўропе (АБСЕ). Галоўным пытаннем парадку дня стане абмен меркаваннямі і прыняцце агульнапалітычнай дэкларацыі, у якой будзе ўтрымлівацца аналіз бягучай сітуацыі ў рэгіёне АБСЕ, вызначаныя задачы для працы Арганізацыі на будучыню. Варта адзначыць, што сустрэчы АБСЕ ў фармаце Саміту не праводзіліся больш за 10 гадоў, паведамляе ІА «Регнум».

Падчас падрыхтоўкі да гэтага мерапрыемства беларускі бок адзначаў неабходнасць адаптацыі АБСЕ да новых геапалітычных рэаліяў, абнаўленні яе праграмнага інструментара, перш за ўсё ў сферы еўрапейскай бяспекі.

Беларускі бок разлічвае, што сустрэча на вышэйшым узроўні паскорыць працэс афармлення АБСЕ ў якасці паўнавартаснай міжнароднай арганізацыі з уласным статутам. Асаблівую ўвагу беларускі бок надае развіццю дзейнасці АБСЕ ў галіне эканамічнага развіцця і аховы навакольнага асяроддзя, уключаючы такія актуальныя пытанні як энергабяспека краінаў і рэгіёна ў цэлым, забеспячэнне сучаснага ўзроўню энергаэфектыўнасці нацыянальных эканомікаў і бяспечнай працы крытычнай энергетычнай інфраструктуры.

Нагадаем, што назіральнікі АБСЕ прадстаўленыя на выбарах прэзідэнта Беларусі, галасаванне павінна адбыцца 19 снежня 2010 года. Справаздача БДІПЧ АБСЕ будзе прынятая да ўвагі ЕЗ і іншымі краінамі пры прызнанні выбараў у Беларусі дэмакратычнымі і адпаведным стандартам ЕЗ.