У Польшчы згарэлі беларускія фуры

• 5.11.2010, 14:12

На тэрыторыі партовага тэрмінала ў Гданьску згарэлі два вялікагрузныя аўтамабілі, якія належаць беларускім транспартным кампаніям.

Машыны з грузам бананаў цалкам знішчаны полымем, паведамляе БелТА.

Паводле дадзеных агенцтва, шкода ацэньваецца ў больш чым 250 тыс. еўра. Паводле папярэдняй інфармацыі, прычынай пажару стала неасцярожнае абыходжанне з пераноснай газавай гарэлкай альбо кароткае замыканне ў кабіне аднаго з аўтамабіляў. У выніку пажару адбыўся выбух, які стаў прычынай узгарання адразу дзвюх машын.

Польскія пажарныя брыгады на працягу чатырох з паловай гадзін тушылі полымя. Адзін з кіроўцаў дастаўлены ў гарадскую лякарню, у яго апёкі 2-й ступені. Яго стан польскія дактары ацэньваюць як здавальняючы. Кіроўца другога грузавіка не пацярпеў.

Генеральны консул Беларусі ў Гданьску Руслан Есін распавёў агенцтву, што консульскія супрацоўнікі наведалі ў шпіталі беларускага кіроўцу. У Гданьск накіроўваюцца прадстаўнікі нашых транспартных кампаній (уладальнікаў згарэлых грузавікоў).

Есін нагадаў, што падобны выпадак адбыўся ў 2009 годзе ў Любускім ваяводстве, калі ў выніку выбуху і пажару пацярпеў беларускі кіроўца. Пацярпелы ў экстраным парадку быў дастаўлены на верталёце ў апёкавы цэнтр.