Актывіст кампаніі Саннікава затрыманы АМАПам

• 1.12.2010, 10:36

Супрацоўнікі АМАПа незаконна затрымалі і абшукалі Андрэя Бажына - актывіста кампаніі Андрэя Саннікава.

29 лістапада ў пераходзе станцыі метро «Пралетарская» да Андрэя Бажына падышлі два амапаўца. Яны сказалі, што беларускі герб «Пагоня», намаляваны на яго шаліку, з'яўляецца забароненай сімволікай, і сказалі, што ён затрыманы для засведчання асобы. Малады чалавек паказаў ім пашпарт і сказаў, што іх дзеянні незаконныя. Тады яго сілай завялі ў пакой міліцыі і абшукалі. Пры гэтым супрацоўнікі АМАП адмаўляліся назвацца, паведамляе сайт «Еўрапейская Беларусь».

Пасля таго, як у Андрэя Бажына знайшлі пасведчанні чальца ініцыятыўнай групы Андрэя Саннікава, ён быў вызвалены. Пратакол затрымання і пратакол асабістага надгляду не быў складзены.

Сёння малады чалавек напісаў у пракуратуру скаргу на незаконныя дзеянні супрацоўнікаў АМАПа.