Ярмошына: «Беспрацоўны кандыдат і прэзідэнт не могуць быць у роўных умовах»

• 9.12.2010, 15:21

Пра гэта кіраўнічка ЦВК заявіла ў адказ на скаргу пра парушэнне Выбарчага кодэкса з боку кандыдата Лукашэнкі.

Экспертную ацэнку заявам Сяргея Калякіна і Галіны Сямдзянавай даў Вадзім Іпатаў, намеснік старшыні ЦВК.

На яго погляд, Аляксандр Лукашэнка не парушаў Выбарчага кодэкса, паколькі не прыцягваў асобаў, змешчаных у падначаленні ці іншай службовай залежнасці, для ажыццяўлення ў працоўны час дзейнасці, якая спрыяе вылучэнню і (ці) абранню кандыдата, перадае «Еўрарадыё».

«Падчас самога мерапрыемства давераныя асобы Аляксандра Лукашэнкі не займаліся агітацыйнай дзейнасцю», — заўважыў Вадзім Іпатаў.

Таццяна Процька, якая прадстаўляе ў ЦВК Уладзіміра Някляева, звярнула ўвагу Цэнтрвыбаркаму на тое, што падчас сустрэчы з даверанымі асобамі Аляксандр Лукашэнка парушыў яшчэ адзін пункт артыкула 73 Выбарчага кодэкса. Згодна з якім, недапушчальна выкарыстанне памяшканняў, займаных дзяржаўнымі органамі, арганізацыямі, для ажыццяўлення дзейнасці, якая спрыяе вылучэнню і (ці) абранню кандыдата, калі іншыя кандыдаты не могуць скарыстацца гэтымі памяшканнямі на аналагічных умовах.

«Беспрацоўны кандыдат і прэзідэнт не могуць быць у роўных умовах!» — адрэагавала на гэтую заўвагу старшыня Цэнтрвыбаркаму Лідзія Ярмошына.