Кіраўнік cаюза ветэранаў ВАВ патрабуе закрыць сайт «Беларускі партызан»
- 26.02.2010, 10:22
На яго думку, электроннае СМІ не мае права выкарыстоўваць у назве «святыя» для ветэранаў словы.
Ліст старшыні Савета Менскай абласной арганізацыі ветэранаў Беларускага грамадскага аб'яднання ветэранаў, Героя Сацыялістычнай Працы, ганаровага грамадзяніна Менскай вобласці А.І. Слабады, апублікавала афіцыйная газета «Рэспубліка».
Прапануем тэкст ліста цалкам:
«Мы, ветэраны Вялікай Айчыннай вайны Менскай вобласці, глыбока абураныя блюзнерскім выкарыстаннем у назве недзяржаўнага электроннага СМІ святых для нас словаў «Беларускі партызан» (інтэрнэт-сайт www.belaruspartisan.org).
У гады Вялікай Айчыннай вайны Меншчына стала адным з першых цэнтраў арганізацыі ўсенароднай партызанскай барацьбы супраць фашысцкіх захопнікаў і іх хаўруснікаў. У розны час у перыяд акупацыі на тэрыторыі вобласці дзейнічалі 3 партызанскія злучэнні, 45 партызанскіх брыгадаў, якія аб'ядноўвалі 213 атрадаў. Агульная колькасць партызанаў Меншчыны дасягала 55 тысячаў чалавек.
На барацьбу з агрэсарам узняўся і стары і малы. Ні ўдзень, ні ўначы не было супакою акупантам. Пад іх нагамі ў прамым сэнсе гарэла зямля, руіны беларускіх гарадоў і сёлаў стралялі ва ўпор.
На вялікі жаль, асобныя людзі працягваюць спрабаваць перапісаць гісторыю Вялікай Перамогі. Пераследуючы гэткія невысакародныя мэты, гэтыя людзі не лічацца з тым коштам, які мы і нашыя паплечнікі аддалі ў імя жыцця цяперашняга пакалення ў свабоднай, незалежнай краіне.
Выкарыстанне ў назве сайта словазлучэння «Беларускі партызан» абражае ўдзельнікаў Вялікай Айчыннай вайны тым, што правакацыйныя матэрыялы, якія размяшчаюцца ў Інтэрнэце пад гэтым загалоўкам, носяць яскрава выражаны, прадузяты, адкрыта антыбеларускі характар. Інфармацыя, якая тут публікуецца, часцяком з'яўляецца хлуснёй, падзеі і факты з жыцця нашай рэспублікі, якія асвятляюцца, бессаромна скажаюцца. Рэдакцыя гэтага СМІ дае трыбуну так званым «незалежным палітыкам» і «экспертам», якія жывуць побач з намі на беларускай зямлі і пры гэтым не саромеюцца абліваць брудам народ Беларусі, яго кіраўніцтва, свядома ігнаруюць поспехі, дасягнутыя за гады існавання Рэспублікі Беларусь, і ставяць знак роўнасці паміж словамі «партызан» і «апазіцыянер».
Сёлета чалавецтва адзначае 65-годдзе перамогі савецкага народа ў Вялікай Айчыннай вайне. У гэты юбілейны год мы асабліва адчуваем клопат дзяржавы. Заклікаем грамадскасць выказацца ў падтрымку нашай пазіцыі».
«Я не хачу ўступаць з палеміку з паважанымі ветэранамі. У гады вайны мая прабабуля была сувязной партызанскага атрада і захоўвала дома сцяг дывізіі Чырвонай арміі. Яе здала паліцаям суседка. Прабабулю павесілі фашысты, і яе імем названая вуліца ў горадзе Асіповічы. Яе сын Мікалай - мой дзед - быў байцом партызанскага атрада. Мой другі дзед Станіслаў, афіцэр Чырвонай арміі, прайшоў праз канцлагер, збег, таксама партызаніў. На жаль, іх даўно няма з намі. Я вельмі люблю сваіх дзядоў і часта ўзгадваю іх добрыя вочы і мудрыя парады. Сапраўдных ветэранаў засталося мала, пра іх трэба клапаціцца, таму спадара А.І. Слабаду я вельмі прашу не нервавацца і паберагчы здароўе, таму што ў беларускай дзяржаве хапае больш важных праблемаў, чым вайна супраць сайта «Беларускі партызан», - так пракаментаваў ліст ветэранаў вядомы журналіст, адзін са стваральнікаў сайта Павал Шарамет.
Ён лічыць, што ліст ветэранаў - не выпадковасць. Гэта, вядома, нагадвае нядаўні скандал у Маскве з закрыццём кавярні «Антысавецкая», але карані ў гэтай гісторыі іншыя.
Цяпер засталося пачакаць, калі падцягнуць цяжкую артылерыю ў выглядзе міліцэйскіх аблаваў, спецаперацыяў КДБ і іншых спецмерапрыемстваў. Відавочна, што ўлады сур'ёзна рыхтуюцца да прэзідэнцкіх выбараў, якія маюць адбыцца, лічыць Шарамет.