Літва святкуе 20-годдзе аднаўлення незалежнасці (Фота)
- 11.03.2010, 14:37
Сёння Літва адзначае Дзень аднаўлення незалежнасці. Беларусь на ўрачыстасцях прадстаўляе былы старшыня Вярхоўнага Савета Станіслаў Шушкевіч.
Першы кіраўнік незалежнай Беларусі возьме ўдзел ва ўсіх ўрачыстасцях з нагоды святкавання аднаўлення незалежнасці Літвы - запланаваныя яго сустрэчы з прэзідэнтам Літвы і лідэрамі еўрапейскіх дзяржаў, а таксама сустрэчы ў Сейме.
У Літву на святкаванне 11 сакавіка прыбылі прэзідэнт Латвіі Валдзіс Затлерс, прэзідэнт Эстоніі Тоомас Хендрык Ільвес, прэзідэнт Польшчы Лех Качыньскі, прэзідэнт Фінляндыі Тар’я Халанен, прэзідэнт Славеніі Даніла Цюрк.
Ва ўрачыстасцях таксама бяруць удзел намеснік памочніка дзяржаўнага сакратара ЗША Памэла Кванрад, міністр па еўрапейскіх справах Швецыі Біргіта Олсан, міністр транспарту Расейскай Федэрацыі Ігар Лявіцін, міністр замежных спраў Украіны Пётр Парашэнка, былы прэзідэнт Эстоніі Арнольд Руутэль і іншыя прадстаўнікі замежных дзяржаў.
У святочных мерапрыемствах удзельнічаюць прадстаўнікі парламентаў Арменіі, Балгарыі, Польшчы, Грузіі, Чэхіі, Ісландыі, Злучанага Каралеўства, Малдовы, Славеніі, Нарвегіі, Фінляндыі, Швецыі, Вугоршчыны, Злучаных Штатаў Амерыкі.
Сёння прэзідэнт Літвы Даля Грыбаўскайтэ ўзяла ўдзел у цырымоніі ўзняцця сцягоў трох Балтыйскіх дзяржаў, якая адбылася на плошчы Сімонаса Даукантаса.
Выступаючы ў Сейме, прэзідэнт адзначыла, што незалежнасць была імкненнем, якое аб'яднала ўвесь народ, запаліла агонь Саюдзіса, запаліла сэрца. Толькі намаганні кожнага актыўнага грамадзяніна Літвы дапамаглі краіне падняцца і ўмацавацца, перадае ru.DELFI.lt.
«Мы адчувалі подых свабоды, былі ўпэўненыя ў сваіх сілах і адно ў адным. Адзінства народа вытрымала ціск блакады і крывавае выпрабаванне 13 студзеня. Аднаўленне незалежнасці 20 гадоў таму, яе абарона і ўмацаванне было неабходнасцю, якую ўсведамляў кожны. Аддадзеная ў Блакадны фонд бабуліна брошка, уступленне ў дабраахвотніцкая шэрагі, гатоўнасць ад пачатку ствараць найважнейшыя літоўскія ўстановы, усё было значна і важна», - сказала з трыбуны прэзідэнт.
Увечары прэзідэнт і госці, якія прыбылі ў Вільню, будуць прысутнічаць на канцэрце з нагоды Дня аднаўлення Літоўскай дзяржавы, які адбудзецца ў Нацыянальнай філармоніі.
Раней Грыбаўскайтэ перадала кветкі сем'ям і блізкім, якія падпісалі Акт ад 16 лютага 1918 года. Гэтыя кветкі сёння будуць ускладзены да могілах тых, хто падпісаў Акт аб аднаўленні Літоўскай дзяржавы.
«У стварэнні дзяржавы бываюць падзеі, якія істотна змяняюць жыццё народа. Такой падзеяй было абвяшчэнне Акту аб незалежнасці Літвы, які абавязваў нацыю імкнуцца да свабоды. Дваццаць выбітных прадстаўнікоў нашага народа, выбраных у Савет Літвы, у гэтым дакуменце выказалі рашучасць народа, што стала падмуркам для аднаўлення незалежнай Літоўскай дзяржавы», - сказала Даля Грыбаўскайтэ на цырымоніі перадачы кветак.
16 лютага 1918 года на паседжанні ў Вільні Літоўскі савет абвясціў аднаўленне незалежнай літоўскай дзяржавы.
У 1940 годзе Літва ўвайшла ў склад СССР, 11 студзеня 1990 года Вярхоўны Савет Літвы абвясціў Акт незалежнасці. У 1991 годзе Літва выйшла са складу Савецкага Саюза.
У Сейме Літвы
Прэзідэнт Польшчы Лех Качыньскі
Прэзідэнт Эстоніі Тоомас Хендрык Ільвес
Даля Грыбаўскайтэ
Прэзідэнт Латвіі Валдзіс Затлерс
Былы прэзыдэнт Літвы Валдас Адамкус