Бакіеў абвінавачаны ў масавых забойствах
- 27.04.2010, 12:35
Зрынуты прэзідэнт Кыргызстана завочна абвінавачаны па двух артыкулах крымінальнага кодэксу.
Яго абвінавачваюць у арганізацыі забойстваў і злоўжыванні службовым становішчам. Такім чынам, падставы для яго экстрадыцыі ёсць. Пра гэта, як перадае БелаПАН, заявіў намеснік старшыні часовага ўрада Кыргызстана Азымбэк Бекназараў, які курыруе праваахоўныя ворганы.
«Па двух артыкулах - за забойства двух і больш чалавек, а таксама злоўжыванне службовым становішчам - пакуль прад'яўленыя абвінавачванні. Ужо ёсць падставы для яго экстрадыцыі », - цытуе Бекназарава РИА Новости.
Ён таксама паведаміў, што напярэдадні вечарам - 26 красавіка - часовы ўрад Кыргызстана прыняў дэкрэт аб адхіленні Бакіева з пасады і зняцці з яго прэзідэнцкага імунітэту.
Крымінальная справа супраць Бакіева ўзбуджаная ў сувязі з гібеллю людзей падчас мітынгу апазіцыі ў Бішкеку 7 красавіка. Тады пры штурме Белага дома загінула звыш 80 чалавек.
16 красавіка Бакіеў пакінуў краіну, накіраваўся ў Казахстан. Гэта стала вынікам перамоваў з удзелам прэзідэнтаў ЗША, Расіі і Казахстана. Бакіеў напісаў заяву аб складанні паўнамоцтваў.
20 красавіка, выступаючы з штогадовым пасланнем беларускаму народу і «нацыянальнаму сходу», Аляксандр Лукашэнка паведаміў, што Бакіеў знаходзіцца ў Менску. На наступны дзень у Выканкаме СНД зрынуты прэзідэнт заявіў, што не прызнае сваёй адстаўкі.
«Дзевяць месяцаў таму народ Кыргызстана абраў мяне прэзідэнтам, і я прысягнуў служыць яму. Няма сілы, якая прымусіць мяне адмовіцца ад маёй клятвы. Толькі смерць спыніць мяне», - сказаў Бакіеў.
Па яго словах, прэм'ер-міністр Расеі Уладзімір Пуцін настаяў на тым, каб ён напісаў заяву аб адстаўцы ў абмен на гарантыі бяспекі паплечнікам. Аднак гарантыі, па словах Бакіева, не былі выкананыя. У той жа час ён заявіў, што не збіраецца вяртацца на радзіму ў якасці дзейнага прэзідэнта.
Як патлумачыў юрыст беларускага дзяржустановы, які пажадаў застацца неназваным, калі новыя ўлады Кыргызстана запатрабуюць ад Беларусі выдачы Курманбека Бакіева, то гэтае пытанне будзе вырашацца не ў агульнакрымінальнай, а ў палітычнай плоскасці.
У агульнакрымінальнай практыцы, па словах эксперта, пытанне аб экстрадыцыі на тэрыторыі СНД вырашаецца на падставе Мінскай канвенцыі 1993 года аб прававой дапамозе і прававых адносінах па грамадзянскіх, сямейных і крымінальных справах. Калі грамадзянін якой-небудзь дзяржавы зрабіў на яго тэрыторыі злачынства і схаваўся ў Беларусі, то беларускія ўлады абавязаны выдаць яго запытваючаму боку.
У той жа час у адпаведнасці з міжнароднымі нормамі і нацыянальным заканадаўствам Беларусь не выдае сваіх грамадзян. Пры гэтым магчыма патрабаванні ў другога боку матэрыялаў у дачыненні да абвінавачанага і прыцягненне яго да адказнасці на радзіме, калі здзейсненае ім дзеянне прадугледжвае пакаранне па мясцовым крымінальным заканадаўстве.
Не выдаць абвінавачанага Беларусь можа таксама ў выпадку прадастаўлення яму палітычнага прытулку. Тады дзяржава бярэ чалавека пад сваю абарону, і яму няма неабходнасці нават ўступаць у беларускае грамадзянства, падкрэсліў юрыст.