«Белсату» прыйдзецца з'ехаць з Варшавы?

• 12.05.2010, 15:27

Упраўленне польскага грамадскага тэлебачання TVP плануе радыкальнае абмежаванне выдаткаў для тэлеканала «Белсат».

Пра гэта, як перадае «Наша Ніва», паведамляе Polskie Radio са спасылкай на аўтарытэтнае выданне «Dziennik Gazeta Prawna».

Дакумент з прапановай пераносу офіса «Белсата» з Варшавы ў Беластоцкую тэлестудыю і стварэння агульнай рэдакцыі некалькі дзён таму ўпраўленне адправіла кіраўніцтву тэлеканала.

У сакратарыяце «Белсата» інфармацыю аб планах пераносу офіса канала ў Беласток пацвердзілі, аднак каментаваць адмовіліся, спаслаўшыся на адсутнасць канкрэтнага рашэння ў гэтай справе.

Такім чынам, кіраўніцтва TVP спрабуюць зэканоміць сродкі. Акрамя пераносу офіса плануецца скараціць 15 супрацоўнікаў. На сённяшні дзень на «Белсаце» працуе 37 штатных і больш за 30 пазаштатных супрацоўнікаў.

TVP з-за складанага фінансавага становішча скарачае выдаткі не толькі на «Белсаце». Неафіцыйна паведамлена, што кіраўніцтва канала рыхтуе масавыя звальненні 600 ці нават тысячы супрацоўнікаў. Акрамя гэтага рыхтуецца спыненне дзейнасці канала «TVP Historіa» і продаж маёмасці. Дзякуючы гэтаму плануецца атрымаць 90 мільёнаў злотых, паведамляе «Dziennik Gazeta Prawna».