«Белнафтахім» апраўдваецца за падвышэнне коштаў на паліва

• 25.05.2010, 16:32

Канцэрн «Белнафтахім» працягвае настойваць на тым, што кошты на паліва ў Беларусі павысіліся ў трэці раз за год у выніку ўвядзення Расеяй экспартных пошлін на нафту.

У выніку ўвядзення Расеяй экспартных пошлін на нафту беларуская нафтахімічная прадукцыя падаражэла на 10-25 адсоткаў, паведаміў намеснік старшыні канцэрна «Белнафтахім» Браніслаў Сівы на адкрыцці XIII Міжнароднай спецыялізаванай выставы «Хімія. Нафта і газ», піша БЕЛТА.

«Расейская пошліна на нафтапрадукты склала 10-25 працэнтаў у кошце беларускіх тавараў нафтахіміі, што вельмі істотна для нас», - адзначыў Браніслаў Сівы. Але, нягледзячы на гэта, прадпрыемствы нафтахімічнага комплексу працягваюць стабільна працаваць, інвеставаць у развіццё вытворчасці.

Трэба адзначыць, што беларускія эксперты неаднаразова абвяргалі заявы «Белнафтахіма». Па іх словах, гэта падаражанне (ужо трэцяе з пачатку года) ніяк не звязана ні з сусветнымі коштамі на нафту, якія знізіліся, ні з расійскімі пошлінамі.

Радавыя аўтамабілісты лічаць, што за іх кошт дзяржава хоча закрыць дзіркі ў бюджэце. У знак пратэсту супраць чарговага падвышэння цэнаў беларускія аўтааматары аб'явілі акцыю пратэсту «Стоп-Бензін». Арганізатары акцыі вырабляюць майкі і інфармацыйныя матэрыялы з лозунгамі «Стоп-Бензін», «Не будзь дойнага каровай!», «Абыйдзі запраўку бокам!» І заклікаюць іншых аўтааматараў скараціць колькасць паездак або зусім адмовіцца ад аўтамабіля 1-4 чэрвеня.