Ля Вярхоўнага суда затрымлівалі і збівалі апазіцыянераў (Фота, абноўлена)

• 6.05.2010, 17:56

Паведамляецца, што збітыя і арыштаваныя былы палітвязень Аляксандр Казулін, а таксама іншыя актывісты апазіцыі.

Затрыманы таксама прадпрымальнік Аляксандр Макаеў, моладзевыя лідэры Мікалай Дземідзенка, Артур Фінькевіч. Пры затрыманні іх збівалі супрацоўнікі АМАПа.

Як паведаміла сайту charter97.org праваабаронца Раіса Міхайлоўская, людзей сталі затрымліваць, калі яны ішлі з суду над Мікалаем Аўтуховічам, і выхопліваць па адным з натоўпу.

«Казуліна, Макаева выхапілі, кінулі ў аўтобус, іх збілі нагамі на маіх вачах», - сказала Раіса Міхайлоўская.

Затрыманыя былі вызваленыя позна ўвечары. У РУУС супраць іх былі складзеныя пратаколы, у якіх апазіцыянераў абвінавацілі ў «дробным хуліганстве» — нецэнзурнай лаянцы як рэакцыі на прысуд прадпрымальнікам. 12 траўня яны паўстануць перад судом.