Польшчу чакае другі тур прэзідэнцкіх выбараў

• 21.06.2010, 8:43

Яраслаў Качыньскі адстае ад Браніслава Камароўскага ўсяго на некалькі адсоткаў.

Разрыў паміж галоўнымі фаварытамі прэзідэнцкіх выбараў у Польшчы: спікерам ніжняй палаты парламента краіны, кандыдатам ад кіруючай партыі «Грамадзянская платформа» Браніславам Камароўскім і лідэрам партыі «Права і справядлівасць» Яраславам Качыньскім - па выніках апрацоўкі 71,02% бюлетэняў складае 2,7%.

Выканаўца абавязкаў прэзідэнта Польшчы, спікер Сейма Браніслаў Камароўскі ад ліберальнай партыі «Грамадзянская платформа» і лідэр кансерватыўнай партыі «Права і справядлівасць» Яраслаў Качыньскі сустрэнуцца ў другім туры прэзідэнцкіх выбараў 4 ліпеня, сведчаць дадзеныя трох еxit poll, апублікаваныя ў Варшаве.

10 красавіка ў авіякатастрофе пад Смаленскам трагічна загінуў прэзідэнт Польшчы Лех Качыньскі, пасля чаго, у адпаведнасці з канстытуцыяй краіны, паўнамоцтвы кіраўніка дзяржавы аўтаматычна перайшлі да спікера ніжняй палаты парламента Браніслава Камароўскага. Згодна з дзеючым заканадаўствам, Камароўскі прызначыў дату правядзення датэрміновых выбараў на 20 чэрвеня. Другі тур прэзідэнцкіх выбараў адбудзецца праз два тыдні 4 ліпеня.

Большасць аналітыкаў пагаджаюцца з думкай, што галоўным адкрыццём прэзідэнцкай кампаніі стаў самы малады ў гісторыі Польшчы кандыдат на пасаду кіраўніка дзяржавы Гжэгаж Наперальскі.

Малады і актыўны палітык ад левых сілаў апынуўся ў складанай сітуацыі: у авіякатастрофе пад Смаленскам загінуў афіцыйны кандыдат у прэзідэнты ад СДЛС, віцэ-спікер Сейма Ежы Шмайдзіньскі. Загінулі таксама Іяланта Шыманэк-Дэрэш і Ізабэла Яруга-Навацка - дзве найярчэйшыя прадстаўніцы левага руху ў Польшчы, якія таксама разглядаліся як патэнцыйныя кандыдаткі на пасаду прэзідэнта Польшчы.

Наперальскі не без ваганняў вырашыў «выклікаць агонь на сябе» і, нягледзячы на малады ўзрост, пагадзіўся ўдзельнічаць у прэзідэнцкай кампаніі. Лідэр СДЛС пачынаў з трох працэнтаў, але яго падтрымка сярод палякаў расла кожны тыдзень. У выніку на фінішнай прамой Наперальскі меў каля 14%. Такая падтрымка лідэра левых сілаў стала сапраўднай палітычнай сенсацыяй.

Як заявіў у інтэрв'ю РІА «Новости» былы прэм'ер-міністр Польшчы Лешэк Мілер, «вынік другога тура прэзідэнцкіх выбараў шмат у чым будзе залежаць ад таго, што скажа Наперальскі сваім выбаршчыкам і за каго будзе рэкамендаваць галасаваць 4 ліпеня».