Аўтамабілістам паказалі ўзор новых правоў (Фота)

• 24.06.2010, 13:30

У Беларусі гатовы ўзор новых правоў кіроўцы, якія плануецца ўвесці ў снежні.

Пра гэта сёння журналістам паведаміў міністр унутраных справаў Анатоль Куляшоў, перадае БелТА.

«Мы планавалі ўвесці новыя правы ў чэрвені-ліпені гэтага года, але ў сувязі з неабходнасцю ўзгаднення гэты працэс зацягваецца», - сказаў міністр.

Новыя правы кіроўцы будуць уяўляць з сябе звычайную пластыкавую картку, на якой будзе фатаграфія ўладальніка правоў, нумар пасведчання кіроўцы, дзяржаўны орган, які яго выдаў, а таксама катэгорыі, якія маюцца.

Раней начальнік УДАІ МУС Юры Літвін паведаміў журналістам, што новыя правы кіроўцы плануецца ўвесці ў снежні. Акрамя таго, ДАІ па-ранейшаму мае намер увесці новую катэгорыю «АМ» для кіроўцаў мапедаў, скутэраў і іншых падобных транспартных сродкаў. Для атрымання такіх правоў не трэба ў абавязковым парадку здаваць іспыты ў Дзяржаўтаінспекцыі. Гэта будзе рабіцца на добраахвотнай аснове. Больш за тое, калі чалавек ужо мае права катэгорыі «А» ці «В», дык па заяўніцкім прынцыпе ён зможа атрымаць і «АМ». У той жа час ДАІ пакуль не збіраецца ўводзіць асобную катэгорыю для кіравання машынамі з аўтаматычнай каробкай перадачаў.