Лукашэнка: «Газпрам» прадае нам газ даражэй, чым Еўропе
- 28.06.2010, 16:49
Беларускі кіраўнік заяўляе аб неабходнасці шукаць замену расейскім энергарэсурсам.
Аляксандр Лукашэнка заявіў, што Беларусь не зможа ў поўным аб'ёме адмовіцца ад расейскіх энергарэсурсаў, але запатрабаваў ад урада пошуку новых крыніц і маршрутаў паставак энерганосьбітаў у краіну.
«Калі сёння расейскае кіраўніцтва заняло такую пазіцыю, напэўна, у іх ёсць падставы для гэтага. І мы крытыкуем іх за гэта, але павінны ўвайсці ў іх становішча. Так як яны павінны ўвайсці ў наша становішча, калі мы будзем шукаць альтэрнатыву газу, нафце, па пытаннях, па якіх нас спрабуюць вельмі моцна «нахіляць», - сказаў Лукашэнка ў панядзелак на нарадзе па пытаннях дыверсіфікавання знешнеэканамічнай дзейнасці, перадае Інтэрфакс.
Таму, па яго словах, «паволі мы павінны сёння 4 млн тон нафты, у будучым годзе - 10 млн тон нафты паставіць у Беларусь з вядомых цэнтраў». «Мы павінны ісці гэтым шляхам, таксама прапрацоўваючы пытанні паставак сюды таннага прыроднага газу і іншых энерганосьбітаў», - заявіў Лукашэнка.
Пры гэтым ён падкрэсліў: «Мы не можам залежыць ад адной дзяржавы, ад аднаго цэнтра паставак, ці то энергарэсурсаў, сыравіны, камплектуючых. Мы павінны «ляцець на двух крылах». «Я вас папярэджваў, каб вы не луналі ў аблоках, а пачыналі жорстка адстойваць нашы інтарэсы. Ніколі на вартасць імгненнай карысці нельга забываць пра стратэгічныя мэты», - заявіў Лукашэнка, звяртаючыся да членаў урада.
«Ведаючы гэта, некалькі гадоў таму мы паспрабавалі знайсці альтэрнатыву вуглевадароднай сыравіне Расеі і выйшлі на рынкі Лацінскай Амерыкі, Афрыкі, Ірана. Туды, дзе вуглевадароднай сыравіны дастаткова», - адзначыў ён. «Мы пачалі здабываць нафту ў Венесуэле і Іране. Больш за тое, мы прыйшлі да таго, што ўжо пастаўляем нафту з Венесуэлы і даволі паспяхова яе перапрацоўваем на нашых прадпрыемствах», - сказаў Лукашэнка.
Ён таксама заявіў, што «сёння стаіць пытанне аб надзейных пастаўках нафты з сусветных рынкаў і па розных маршрутах». «Мы ні ў якім выпадку не павінны паўтарыць памылку, якая была з Расеяй. І пастаўка нафты з іншых рынкаў па адным маршруце такая ж небяспечная, як зараз - залежнасць ад адной дзяржавы па пастаўках вуглевадароднай сыравіны», - заўважыў Лукашэнка. Таму, па яго словах, «прапрацоўваецца некалькі напрамкаў, як па нафце, так і па газе».
Лукашэнка паведаміў, што перад нарадай у яго адбылася сустрэча з прэм'ер-міністрам Літвы, падчас якой кіраўнік літоўскага ўраду «пацвердзіў, што «Газпрам» прадае нам газ даражэй, чым яго сённяшні кошт у Еўропе».
«Вядома, такі газ у Еўропе купляць не будуць, і цану «Газпраму» ўтрымаць будзе складана. Але гэта іх праблемы, іх тавар. Мы, па вялікім рахунку, можам спрачацца, дамаўляцца ці не дамаўляцца, але мы заўсёды павінны мець альтэрнатыву», - заявіў Лукашэнка.