S&P панізіла рэйтынгі Беларусі, прагноз «негатыўны»

• 15.03.2011, 16:46

Міжнароднае рэйтынгавае агенцтва Standard&Poor's панізіла доўгатэрміновы крэдытны рэйтынг Беларусі па абавязацельствах у замежнай валюце з «В+» да «В».

А доўгатэрміновы рэйтынг па абавязацельствах у нацыянальнай валюце з «ВВ» да «В+». Кароткатэрміновыя рэйтынгі па абавязацельствах у замежнай і нацыянальнай валюце пацверджаныя на ўзроўні «В». Прагноз па доўгатэрміновым рэйтынгах - «Негатыўны», гаворыцца ў паведамленні S&P.

Ацэнка рызыкі перавода і канвертацыі валюты для беларускіх несуверэнных пазычальнікаў перагледжаная на «В».

Рэйтынг чаканага ўзроўня пакрыцця абавязку пасля дэфолту, раней прысвоены прыярытэтным незабяспечаным абавязкам Беларусі, застаўся на ўзроўні «4», што адлюстроўвае чаканні S&P 30-50-адсоткавага пакрыцця абавязку ў выпадку дэфолту па камерцыйным абавязку Рэспублікі Беларусь. Адзнака заснаваная на сцэнары (не базавым), паводле якога магчымыя істотныя негатыўныя тэндэнцыі знешняга фінансавання не змогуць кампенсавацца мерамі эканамічнай палітыкі.

«Рэйтынгавыя дзеянні адлюстроўваюць ўзрослую ўразлівасць краіны перад неспрыяльнымі тэндэнцыямі на знешнім фінансавым рынку ў сувязі з пагаршэннем стану яе даступных рэзерваў», - заявіла крэдытны аналітык Standard&Poor's Ана Матэс.

Прагноз «Негатыўны» адлюстроўвае верагоднасць паніжэння рэйтынгаў у тым выпадку, калі планы краіны па забеспячэнні знешняга фінансавання будуць парушаныя ў выніку істотнага павышэння адсоткавых ставак або непрадбачаных перашкодаў на шляху прыцягнення знешняга фінансавання. Рэйтынгі могуць стабілізавацца на бягучым узроўні, калі Беларусь павялічыць свае чыстыя міжнародныя рэзервы. Акрамя гэтага, краіне, хутчэй за ўсё, будзе неабходна правесці рэформы, накіраваныя на ўмацаванне сваёй знешняй канкурэнтаздольнасці, адзначаецца ў паведамленні.