Эмануэліс Зінгерыс распавёў пра БелАЭС ў Кангрэсе ЗША
- 1.04.2011, 13:27
Старшыня Камітэта па замежных справах Палаты прадстаўнікоў Кангрэсу ЗША Ілеан Рос-Лецінен абяцае дэталёва азнаёміцца з асцярогамі Літвы ў сувязі з планамі Беларусі пабудаваць недалёка ад Вільні АЭС.
Пра гэта распавёў старшыня Камітэта па замежных справах (КЗС) сейма Літвы Эмануэліс Зінгерыс, які знаходзіцца ў ЗША.
"Рос-Лецінен асабліва цікавілася планамі Беларусі пабудаваць у 30 км ад літоўскай мяжы і ў 50 км ад сталіцы Літвы Вільні АЭС і адпаведнымі беларуска-расейскімі дамовамі на гэтую тэму", - гаворыцца ў распаўсюджаным у пятніцу прэс-рэлізе.
Зінгерыс інфармаваў, што гэтыя планы Беларусі і Расеі выклікаюць занепакоенасць у жыхароў Літвы. Па словах палітыка, Літва шмат разоў заклікала і запрашала Беларусь выконваць міжнародныя абавязацельствы і прадаставіць інфармацыю аб тым, чаму суседняя краіна выбрала пляцоўку пад будаўніцтва будучай АЭС у такой блізкасці ад мяжы з Літвой.
"Старшыня Камітэта па замежных справах Палаты прадстаўнікоў Кангрэсу ЗША Ілеана Рос-Лецінен адзначыла, што яе здзіўляюць рашэнні Беларусі, звязаныя з намерамі будаваць будучую АЭС. Яна паабяцала дэталёва азнаёміцца з сітуацыяй і прыняць да ведама праблемы, якія падымае Літва", - гаворыцца ў прэс -рэлізе.
Афіцыйныя асобы Літвы пярэчаць супраць планаванага будаўніцтва АЭС у Беларусі і Калінінградскай вобласці Расеі паблізу межаў Літвы, паведамляе kurier.lt.
Літва крытыкуе гэтыя праекты і сцвярджае, што не атрымала адказы на пытанні аб уздзеянні новых станцый на навакольнае асяроддзе. Самы вялікі непакой выклікае тое, што рэактары, якія плануецца пабудаваць каля самай мяжы Літвы, называюць эксперыментальнымі, яны могуць прычыніць шкоду экасістэме рэк Нярыс і Нёман, не выпрацаваныя таксама планы на выпадак аварый.