У Веткаўскім раёне каровы пасуцца на лузе, які «звініць» ад радыяцыі

• 26.04.2011, 9:33

Вёска Бесядзь Веткаўскага раёна прымосцілася на маляўнічым беразе аднайменнай ракі.

Па выглядзе - такая ж вёска, як і ўсе астатнія на забруджаных тэрыторыях: разрабаваныя скасабочаныя хаты, сядзібы, зарослыя кустоўем і дрэвамі, заасфальтаваныя дарогі, помнік загінулым у Другой сусветнай вайне з вянком, ускладзеныя на леташняе 9 Мая, распавядае карэспандэнт БелаПАН.

Афіцыйна ў вёсцы ніхто не жыве - узровень радыяцыйнага забруджвання гэтага не дазваляе. Але на навакольных лугах пасецца немаленькае статак кароў - па меншай меры дваццаць галоў. І гэта пры тым, што дазіметр «адзвінеў» на пашы 164 (!) мікрарэнтгена на гадзіну.

Гаспадыня статка - Ніна ва ўзросце за 50. Займацца скацінай дапамагаюць ёй сыны, якія жывуць у Ветцы. Раз вырошчвае, значыць, ёсць попыт. Па непацверджанай інфармацыі, жывёлы здаюцца на ферму, дзе цяляты ўтрымліваюцца пару тыдняў на чыстым рацыёне, пасля чаго іхняе мяса нібыта становіцца прыдатным да перапрацоўкі.

Між тым «фаніць» у Бесядзі ўсё - луг, сена, дровы. Але ўлетку, кажуць, тут з'яўляюцца нават адпачывальнікі, грыбнікі і аматары рыбалкі. Бо мясціны - ну дужа прыгожыя месцы, а радыяцыя - яна ж не патыхае.