Банкаўская супольнасць у стане "цяжкага чакання"

• 26.04.2011, 12:46

Беларускія банкі, як дзяржаўныя, так і прыватныя, у панядзелак-аўторак праводзяць адзінкавыя ўгоды на пазабіржавым рынку, фактычна рэгіструючы ўгоды паміж кліентамі.

"Прыватныя банкі праводзяць адзінкавыя ўгоды куплі-продажу замежнай валюты па курсе Br5200-5400/$1 (на 70-75% вышэй за афіцыйны курс)", - сказаў агенцтву "Інтэрфакс-Захад" прадстаўнік аднаго з банкаў.

Каментуючы ўзровень рынкавага курсу ва ўмовах дзеючай вуснай рэкамендацыі Нацбанка, які раіць банкам не здзяйсняць угоды з далярамі вышэй за Br4500/$1, суразмоўца канстатаваў: "Так. Рэкамендацыі ёсць. Але банкі ўжо маюць вялікі досвед працы ў такіх умовах і маюць набор "ценявых" схем, якія дазваляюць гэтыя рэкамендацыі абыходзіць".

Прадстаўнік аднаго з дзяржбанкаў паведаміў агенцтву, што "ўгоды з валютай здзяйсняюцца, але яны не масавыя". Па ягоных словах, бягучы пазабіржавы курс у дзяржбанку не перавышае рэкамендаваны Нацбанкам ўзровень. "Мы ж дзяржбанкі, павінныя выконваць рэкамендацыі рэгулятара", - сказаў суразмоўца.

Ён патлумачыў, што ў дзяржбанкаў "зараз, фактычна, угоды з валютай не з'яўляюцца рыначнымі, яны заключаюцца паміж прадпрыемствамі ўнутры якога-небудзь ведамства па курсе Br4400-4500/$1, банк толькі рэгіструе ўгоду".

Пры гэтым прадстаўнікі банкаўскай супольнасці адзначаюць, што склалася сітуацыя "цяжкага чакання", у якім зараз знаходзяцца банкі. Банкі чакалі ад рэгулятара рашэння аб правядзенні на біржы альтэрнатыўнай гандлёвай сесіі, якая была анансаваная на пачатку мінулага тыдня. Пасля гэтага рушылі ўслед вусныя рэкамендацыі НББ аб абмежаванні ўзроўню курсу на пазабіржавым рынку ў межах Br4,5/$1, што прывяло да мінімізацыі ўгод з замежнай валютай.

Між тым, у аўторак НББ распаўсюдзіў прэс-рэліз, з якога вынікае, што рэгулятар адмовіўся ад раней агучаных планаў правядзення дадатковай сесіі валютных таргоў на біржы.

"Нацыянальны банк паведамляе, што ў цяперашні час няма неабходнасці ўвядзення дадатковай сесіі на таргах ААТ "Беларуская валютна-фондавая біржа", - сказана ў прэс-рэлізе ўпраўлення інфармацыі НББ.