Слуханні ў Кангрэсе: Лукашэнка - бандыт, які павінен пакінуць сваю пасаду
- 3.04.2011, 13:09
1 красавіка ў камітэце па замежных справах Кангрэса ЗША сумесна з падкамітэтам па справах Еўропы і Еўразіі і падкамітэтам па справах Афрыкі, аховы здароўя і правах чалавека адбыліся слуханні па сітуацыі ў Беларусі.
ЗША спрабуюць ўздзейнічаць на сітуацыю ў Беларусі шляхам усталявання санкцый і прадастаўлення дапамогі насельніцтву краіны, адзначыў намеснік асістэнта Дзяржсакратара ЗША Дэніэл Расэл.
«ЗША, сумесна з еўрапейскімі партнёрамі, па-першае, дамагаюцца вызвалення палітычных зняволеных і спынення іх пераследу ўладамі Беларусі і, па-другое, дапамагаюць тым беларусам, якія імкнуцца да дэмакратыі», - заявіў Дэніэл Расэл падчас выступу на слуханнях падкамітэту Кангрэса па Афрыцы, глабальнага здароўя і правах чалавека.
Па словах Расэла, прэзідэнцкія выбары 19 снежня 2010 г. прайшлі са шматлікімі парушэннямі. Рэжым Аляксандра Лукашэнкі задушыў мірныя пратэсты супраць вынікаў галасавання, былі арыштаваныя 700 дэманстрантаў і сем кандыдатаў у прэзідэнты. Палітычныя пераследы апанентаў працягваюцца да гэтага часу, дадаў ён.
«Толькі прагрэс у дэмакратычных рэформах і правах чалавека будуць садзейнічаць наладжванню адносінаў паміж ЗША і Беларуссю», - падкрэсліў Расэл. Ён таксама адзначыў, што ў мінулым санкцыі супраць рэжыму Лукашэнкі прывялі да станоўчых вынікаў.
Кангрэсмен-рэспубліканец Крыс Сміт сказаў, што Лукашэнка працягвае ігнараваць заклікі міжнароднай супольнасці палепшыць сітуацыю з правамі чалавека ў краіне. І гэта адна з прычын таго, што ЗША і ЕЗ спрабуюць знайсці новыя спосабы ўздзеяння на рэжым беларускага кіраўніка.
Незадоўга да выбараў у Беларусі назіралася некаторае паслабленне палітычнага ціску на апазіцыйныя сілы, і з'явілася надзея на тое, што сітуацыя ў краіне паляпшаецца, дадаў Крыс Сміт. «Аднак гэтыя надзеі выпарыліся ўжо 19 снежня», - сказаў ён.
«Маштаб гвалту і жорсткасці падаўлення ў паслявыбарчы перыяд перасягнуў усё, што Лукашэнка прадпрымаў у мінулым, - працягнуў кангрэсмен. - Сёння ЗША і ЕЗ не будуць спрабаваць супакоіць Лукашэнку і паспрабаваць паўплываць на ягоны рэжым хваламі».
Кангрэсмен-рэспубліканец і кіраўнік падкамітэту Дэн Бертан сказаў, што рэжым Лукашэнкі не толькі душыць свабоды ўласнага народа, але таксама дапамагае дэспатам ў іншых краінах.
Лукашэнка парушыў міжнародныя санкцыі супраць Ірана і працягвае эканамічнае супрацоўніцтва з Тэгеранам. Акрамя таго, улады Беларусі падазраюцца ў продажы зброі і боепрыпасаў рэжыму Муамара Кадафі ў Лівіі. Нарэшце, ёсць доказы таго, што Лукашэнка пастаўляў верталёты і зброю ў Кот-д'Івуар для падаўлення дэманстрацый, адзначыў Бертан.
«Беларускі рэжым - гэта апошні напамін пра «жалезную заслону», і Лукашэнка - бандыт, які павінен пакінуць сваю пасаду», - заявіў кангрэсмен.
Дырэктар амерыканскай арганізацыі «Фрыдам хаўс» Дэвід Крамер сказаў «Голасу Амерыкі», што сёння галоўнай задачай ЗША і ЕЗ павіннае стаць вызваленне палітычных зняволеных.
«З дапамогай санкцый супраць дзяржаўных кампаній і чыноўнікаў мы павінныя дамагчыся вызвалення нявінных людзей», - адзначыў Крамер. Таксама, па ягоных словах, неабходна павялічыць падтрымку грамадзянскай супольнасці і сіл апазіцыі, дадаў ён.
«Мы спадзяемся, што ЕЗ будзе больш актыўна падтрымліваць санкцыі ЗША супраць беларускага рэжыму», - падкрэсліў Крамер.
Выступаючы на слуханнях, супрацоўнік Цэнтру Карнэгі Мэцью Раджанскі сказаў, што жорстка падаўленыя пратэсты 19 снежня мінулага года значна пагоршылі сітуацыю не толькі ў самой краіне, але і ізалявалі яе ад міжнароднай супольнасці.
Да гэтага часу ЗША і ЕЗ зрабілі выдатную працу разам, усталяваўшы санкцыі супраць Лукашэнкі, лічыць Раджанскі. «Сёння, дзякуючы палітыцы «перазагрузкі» і пацяпленню адносінаў паміж ЕЗ і Расеяй, існуе унікальная магчымасць каардынаваць дзеянні паміж Масквой, Брусэлем і Вашынгтонам, і адняць у Лукашэнкі магчымасць дыктаваць свае ўмовы Захаду і Усходу», - адзначыў ён.
Выступоўцы пагадзіліся з тым, што дэмакратыя ў Беларусі калі-небудзь пераможа і кіраванню «апошняга дыктатара Еўропы» будзе пакладзены канец.