Лукашэнка - нязменны вораг прэсы
- 3.05.2011, 17:16
У міжнародны спіс ворагаў прэсы, складзены арганізацыяй «Рэпарцёры без межаў», патрапілі 9 кіраўнікоў постсавецкай прасторы
Амаль чатыры дзесяткі «ворагаў свабоды прэсы» уключаныя ў апублікаваны ў аўторак, 3 мая, спіс міжнароднай арганізацыі «Рэпарцёры без межаў». Як адзначае агенцтва epd, у спісе апынуліся кіраўнікі дзяржаваў і ўрадаў, каралі, ваенізаваныя групоўкі, мафіёзныя структуры і экстрэмісцкія арганізацыі. «Рэпарцёры без межаў» абвінавачваюць іх у выкарыстанні ўлады для ўвядзення цэнзуры, у выкраданнях, катаваннях і забойствах журналістаў, гаворыцца ў заяве арганізацыі па нагоды Сусветнага дня свабоды прэсы, які адзначаецца 3 мая.
У прыватнасці, у лік 38 найбуйнейшых ворагаў свабоды прэсы ўвайшлі прэм'ер-міністр Расеі Уладзімір Пуцін, прэзідэнты Узбекістана, Туркменістана, Азербайджана і Казахстана, а таксама шматгадовы ўладальнік тытула «вораг свабоды прэсы» беларускі дыктатар Аляксандр Лукашэнка.
Пасля прэзідэнцкіх выбараў у Беларусі былі арыштаваныя і прыцягваюцца па крымінальным артыкуле журналісты Ірына Халіп, Наталля Радзіна і Аляксандр Атрошчанкаў. Па артыкуле «паклёп» у дачыненні да Лукашэнкі арыштаваны журналіст польскай «Газеты выборчай» Анджэй Пачобут. На мяжы закрыцця апынуліся апошнія незалежныя рэспубліканскія выданні «Народная воля» і «Наша Ніва».
Экс-прэзідэнт Туніса бен Алі ў гэтым годзе ў рэйтынг не ўвайшоў. Сярод пачаткоўцаў апынуўся кароль Бахрэйна Хамад бен Іса аль-Халіф. «Падаўленне дэманстрацый у Сірыі, Емене альбо Бахрэйне суправаджалася гвалтам у дачыненні да прадстаўнікоў СМІ і маштабнай цэнзурай, - сказаў, каментуючы новы рэйтынг, прадстаўнік «Рэпарцёраў» Міхаэль Радэске.
Як паведамляе Deutsche Welle, у Саудаўскай Аравіі каралеўская сям'я цалкам кантралюе СМІ. У Лівіі з лютага 2011 года падчас баёў паўстанцаў з сіламі Кадафі былі забітыя чатыры журналіста. Ворагамі свабоды прэсы ў гэтым годзе таксама названыя радыкальная групоўка Талібан, італьянская мафія, мексіканская наркамафія. Калумбійская рэвалюцыйная армія FARC выкрэсленая са спісу: на працягу апошніх трох гадоў баявікі гэтага руху не здзяйснялі нападаў на журналістаў.
З нагоды Сусветнага дня свабоды прэсы генеральны сакратар ААН Пан Гі Мун высока ацаніў ролю сродкаў масавай інфармацыі ў барацьбе супраць свавольства ўладаў і рэпрэсій. «У выпадках, калі ўрады падвяргаюць рэпрэсіям сваіх грамадзян і ўхіляюцца ад любых форм кантролю, свабода прэсы ператвараецца ў найважнейшая сродак, з дапамогай якога выкрываюць тых, хо мае ўладу, і аднаўляецца давер грамадскасці», - заявіў ён у Нью-Ёрку.