Бальнічны Пракаповіча як інструмент манетарнай палітыкі
- 30.05.2011, 12:52
Старшыня праўлення Нацбанка Беларусі Пётр Пракаповіч зноў пайшоў на бальнічны.
Аб гэтым паведаміла агенцтву «Інтэрфакс-Захад» крыніца ў банкаўскіх колах.
У НББ афіцыйна не паведамляюць, ці працягвае кіраўнік НББ выконваць свае абавязкі. «А навошта вам гэта ведаць? Мы гэта не каментуем», - заявіў агенцтву начальнік упраўлення інфармацыі - прэс-сакратар НББ Анатоль Драздоў у адказ на просьбу агенцтва паведаміць, ці прысутнічае кіраўнік НББ на сваім працоўным месцы.
А. Драздоў таксама адмовіўся ад каментароў пра магчымыя рэгуляторныя крокі НББ для стабілізацыі сітуацыі на валютным рынку пасля апятнічнай нарады ў прэзідэнта Беларусі, у якой прыняў удзел П. Пракаповіч. «Мы гэта не каментуем. У мяне няма інфармацыі», - сказаў начальнік упраўлення інфармацыі НББ.
Між тым, апытаныя агенцтвам прадстаўнікі банкаўскай супольнасці канстатуюць, што пазабіржавы, у тым ліку міжбанкавы, валютны рынак працягваюць стагніраваць пасля рэанімаваных 24 мая абмежаванняў маржы пры ўгодах куплі-продажу замежнай валюты ў межах 2% да афіцыйнага курсу, які ў той дзень быў дэвальваваны на 55%.
Насельніцтва Беларусі па-ранейшаму прастойвае ў чэргах перад абменніках у надзеі купіць любую замежную валюту, прапанова якой не павялічылася пасля дэвальвацыі афіцыйнага курсу, канстатуюць банкіры.
Лукашэнка ў мінулую пятніцу запатрабаваў ад Нацбанка і ўрада рэальных крокаў па стабілізацыі крызіснай сітуацыі на валютна-фінансавым рынку, якая выклікала паніку ў спажывецкім сектары.
«Калі вы сапраўды пралічылі кошт замежнай валюты, тады забяспечвайце адзіны курс. Чаго вы чакаеце? Калі вы сапраўды пралічылі, што Br5 тыс. за даляр здыме спекулятыўны попыт, забяспечвайце. Але кожны дзень павінная быць дынаміка. І калі гэтай дынамікі не будзе, Міхаіл Уладзіміравіч і Пётр Пятровіч, вы першымі пакладзеце партыйныя білеты, кажучы савецкай мовай!» - падкрэсліў беларускі кіраўнік.
Аднак, па словах А. Лукашэнкі, больш яго турбуе іншае: «Калі мы не будзем дзейнічаць хоць бы так, як вы некалі мне дакладалі і мы вызначаліся, то мы будзем спараджаць яшчэ большыя праблемы».