Незалежныя прафсаюзы адмовіліся ўдзельнічаць у бутафорскім семінары
- 4.05.2011, 12:09
Беларускі кангрэс дэмпрафсаюзаў не будзе ўдзельнічаць у трохбаковым семінары з прадстаўнікамі ўрада, прафсаюзаў і экспертамі Міжнароднай арганізацыі працы 13 мая.
Першапачаткова планавалася, што сустрэча будзе прысвечаная пытанню выканання ўрадам рэкамендацый МАП. Аднак урад самастойна змяніў праграму семінара, прапанаваўшы абмеркаваць пытанне прадстаўнічасці і пашырэння паўнамоцтваў прафсаюзаў, якія ўваходзяць у прадзяржаўную ФПБ.
Сфарміраваная урадам праграма семінара не адпавядае заяўленай мэце і непрымальная для БКДП, гаворыцца ў паведамленні, апублікаваным на сайце Кангрэсу. У сувязі з гэтым незалежны прафцэнтр заяўляе аб сваёй адмове ўдзельнічаць у мерапрыемстве, паведамляе Praca-By.info.
«Характар і тэматыка семінара, у адпаведнасці са згаданай праграмай, не накіраваныя на аналіз прычын парушэнняў правоў прафсаюзаў у краіне. Праграма прадугледжвала толькі інфармацыйныя паведамленні прадстаўнікоў МБП і навязванне незалежным прафсаюзам і МАП абмеркавання пытання аб прадстаўнічасці больш шматлікіх прафсаюзаў (г.зн. прафсаюзаў, якія ўваходзяць у ФПБ) і пашырэнні іхніх правоў. Відавочна, што ўрад Беларусі працягвае сваю палітыку бясконцых маніпуляцый, спробаў зводу ад рашэння ключавой праблемы - рэгістрацыі незалежных прафсаюзных арганізацый і захавання іхніх правоў», - тлумачыць сваё рашэнне БКДП.
Нагадаем, у пачатку года БКДП накіраваў у Савет па ўдасканаленні заканадаўства ў сацыяльна-працоўнай сферы дакумент аб спрашчэнні працэдуры рэгістрацыі прафсаюзаў і прывядзенне яе ў адпаведнасць з рэкамендацыямі МАП. Сутнасць яго заключаецца ў тым, каб праваздольнасць прафсаюза, аб'яднання (асацыяцыі) прафсаюзаў, першаснай прафсаюзнай арганізацыі як юрыдычнай асобы ўзнікала з моманту іх паведамляльнай рэгістрацыі ў Міністэрстве юстыцыі. У згаданым дакуменце таксама ўтрымліваецца патрабаванне аб адмене пастаноўкі на ўлік ў рэгіструючых органах аргструктур прафсаюзаў, якія не з'яўляюцца юрыдычнымі асобамі, што супярэчыць міжнародным нормам і Грамадзянскаму Кодэксу краіны. Патрабаванне аб прадстаўленні юрыдычнай адрэсы для рэгістрацыі і пастаноўкі на ўлік аргструктур (першасных арганізацый) прафсаюзаў па-ранейшаму часта з'яўляецца непераадольнай перашкодай для дзейнасці незалежных прафсаюзаў.