Дунья Міятовіч: Адна з самых небяспечных формаў цэнзуры - блакіроўка сайтаў

• 1.06.2011, 18:41

Прадстаўнік АБСЕ па пытаннях свабоды СМІ Дунья Міятовіч заявіла, што ў ХХI стагоддзі доступ да Інтэрнэту з'яўляецца асновай існавання плюралізму і вольных СМІ.

Дзяржаўнае рэгуляванне, якое перашкаджае доступу да Інтэрнэту, не можа быць нічым апраўдане.

«Інтэрнэт дае беспрэцэдэнтныя магчымасці для пашырэння свабоды выказвання меркаванняў і плюралізму. Ён з'яўляецца адным з найважнейшых элементаў пабудовы і ўмацавання дэмакратыі», - заявіла Міятовіч ў Будапешце пасля падпісання Сумеснай дэкларацыі аб свабодзе выказванняў і доступу да Інтэрнэту.

Міятовіч падкрэсліла, што недэмакратычныя ўрады выкарыстоўваюць крывадушную аргументацыю, каб пазбавіць сваіх грамадзян права на доступ да Інтэрнэту.

«Урады, якія блакуюць вэбсайты, звяртаюцца да адной з самых небяспечных формаў цэнзуры, што проста недапушчальна, - цытуе заяву Радыё «Свабода». - Перакрыццё доступу па меркаваннях нацыянальнай бяспекі або ў мэтах падтрымання грамадскага парадку ніколі не павіннае выкарыстоўвацца ў якасці падставы для абмежавання свабоды выказвання меркаванняў і перашкоды свабоднай плыні інфармацыі».

Разам з Міятовіч Дэкларацыю аб свабодзе выказвання меркаванняў і доступу да Інтэрнэту падпісалі таксама тры спецыяльных дакладчыкі міжнародных арганізацый па пытаннях свабоды слова.

У Сумеснай дэкларацыі упаўнаважаныя ў пытанні свабоды выказванняў, у прыватнасці, заявілі:

• Свабода выказвання меркаванняў распаўсюджваецца на Інтэрнэт гэтак жа, як і на ўсе іншыя сродкі камунікацыі;

• Ніхто з тых, хто дае тэхнічныя паслугі Інтэрнэту, не павінен несці адказнасці за кантэнт, створаны іншымі;

• Сістэмы фільтрацыі кантэнту, да якіх прымушаюць дзяржаўных ці камерцыйных пастаўшчыкоў паслугаў, уяўляюць сабой абмежаванне свабоды выказвання;

• Самарэгуляцыя можа служыць эфектыўным інструментам барацьбы са шкодным кантэнтам і павінная заахвочвацца.