Партыя Януковіча: Лукашэнка будзе шкадаваць пра тое, што сказаў

• 20.06.2011, 12:13

Аляксандр Лукашэнка часта губляе кантроль і яшчэ будзе шкадаваць з нагоды сваіх словаў аб залежнасці Украіны ад ЗША.

Аб гэтым «Новому Региону» заявіў намеснік кіраўніка фракцыі Партыі рэгіёнаў у Вярхоўнай Радзе дэпутат Міхаіл Чэчатаў.

«Я разумею ўсю складанасць сітуацыі ў Беларусі, яна вельмі няпростая, таму Лукашэнка робіць такія эмацыйныя заявы. Лукашэнка часта губляе кантроль, ён не падумаў і, відавочна, будзе шкадаваць пра тое, што сказаў», - адзначыў суразмоўца агенцтва.

«Ягоная заява абсалютна не мае ніякага дачынення да рэальнасці. Украіна праводзіла і будзе праводзіць праўкраінскі палітыку, якая адказвае нацыянальным інтарэсам, выбудоўваючы нармальныя адносіны з усімі дзяржавамі, блізкага і далёкага замежжа. Мы выраўнавалі нашы адносіны і з НАТА. Мы супрацоўнічаем з НАТА, не ўваходзячы ў гэтую арганізацыю. Мы супрацоўнічаем з МВФ. А выказванні Лукашэнкі носяць эмацыйны характар, на іх наклала адбітак сітуацыя ў краіне», - яшчэ раз падкрэсліў Чэчатаў.

Напярэдадні Лукашэнка заявіў, што Захад і Амерыка працягваюць утрымліваць Украіну «на кароткім павадку», з-за чаго Кіеў адмаўляецца далучацца да Мытнага саюзу. «Трымаюць Украіну, можна сказаць, на кароткім павадку», - сказаў беларускі дыктатар.