Зварот да рабочых: Ідзіце на плошчу разам з народам!

• 28.06.2011, 14:19

«Рэвалюцыя праз сацыяльныя сеткі» звярнулася да рабочых.

Працаўнікі заводаў і прадпрыемстваў!

Хопіць задавольвацца абяцаннямі! Вас ізноўку хочуць падмануць!

Па тэлевізары - ілжывая прапаганда, быццам бы рабочым выдаюць кватэры і жыццё ў іх паляпшаецца. Але ж усе кватэры ўжо раздалі «сваім». Дадаткі да вашых заробкаў удвая з’ядуць дэвальвацыя і інфляцыя.

Цяпер улада распачне спробу вас супакоіць. Яны могуць і заробкі павялічыць - каб вы не падключыліся да пратэстаў студэнтаў і моладзі 29 чэрвеня і 3 ліпеня.

А як прыйдзе восень - наступяць цяжкія часы. Заводы ў ходзе прыватызацыі будуць прадаваць. Пачнуцца масавыя звальненні. Будуць перабоі з газам і электрычнасцю. Вас зноў падмануць, але пратэставаць вы не зможаце - усіх вашых саюзнікаў, студэнтаў і інтэлігенцыю разгоняць і перасаджаюць.

Таму мы заклікаем вас не чакаць калі «певень дзяўбне», а выходзіць на плошчу разам з моладдзю ЗАРАЗ! Толькі так, своечасова, вы абароніце свае правы.

Улады на чале з Лукашэнкам цягнуць нас у эканамічную бездань. Патоне сам, але і вас зацягне. 17 гадоў нам кажуць: «пачакайце родненькія, усё вам будзе». Ваша цяжкая праца не заслужыла такога стаўлення.

Дзе вашыя сацыяльныя гарантыі? Вашыя сем'і могуць дазволіць сабе якаснае харчаванне? Добры адпачынак на моры? Дзеці і жонкі чыноўнікаў - могуць!

Што рабіць?

Ісці на плошчу, разам з народам, супраць Лукашэнкі!

Сёння вы падтрымаеце студэнтаў, а ўвосень яны падтрымаюць вас!

Прыходзьце 29 чэрыеня і 3 ліпеня ў 19:00 на галоўную плошчу вашага горада!

Знаходзьцеся на плошчы без лозунгаў, сімволікі, транспарантаў і любых падставаў для затрымання. Мы запаўняем вуліцы - гэтага яны і баяцца, больш за любыя сцягі і транспаранты!

Чуеце, што людзі пляскаюць у далоні - ведайце, што гэта мы! Будзьма у адных шэрагах, а не паасобку.

Нам патрэбны кожны з вас!

Раздрукуй! Прачытай! Перадай іншаму!