13 ліпеня было затрымана не менш за 100 чалавек

• 14.07.2011, 9:22

У ходзе акцый маўклівага пратэсту 13 ліпеня затрымана не менш за 100 чалавек, у тым ліку як мінімум 25 у Менску.

Такую выснову можна зрабіць з разрозненых паведамленняў СМІ і праваабаронцаў.

Частка затрыманых, у тым ліку журналісты БелаПАН Захар Шчарбакоў і Павел Падабед, адпушчаная. На астатніх складзеныя пратаколы аб адміністрацыйным правапарушэнні. У Менску, паводле інфармацыі праваабаронцаў, затрыманых дастаўляюць у Цэнтр ізаляцыі правапарушальнікаў на вуліцы Акрэсціна, дзе яны будуць знаходзіцца да суду.

Сярод затрыманых падчас акцый было нямала выпадковых людзей, у тым ліку італьянец - саўладальнік аднаго з кафэ ў Гомелі.

У сталіцы акцыя ізноў была арганізаваная ў новым фармаце: удзельнікам прапанавалі сабрацца ля крамаў і гандлёвых цэнтраў «Беларусь», «Еўрапейскі», «Чкалаўскі», «Рыга», «Карона», а таксама рэстаране «Максібіс», а пасля накіравацца да бліжэйшай станцыі метро, ​​даехаць да плошчы Перамогі, Нацыянальнай акадэміі навук і рухацца насустрач адзін аднаму, не пляскаючы і не правакуючы міліцыю. Акцыя завяршылася звонам будзільнікаў на мабільных тэлефонах, пасля чаго пачалася актыўная фаза затрыманняў. Невядомыя ў цывільным перашкаджалі працы журналістаў, перш за ўсё відэааператараў, піша БелаПАН.

Доступ у сацыяльную сетку «Вконтакте», дзе ўтварылася інтэрнэт-супольнасць «Рэвалюцыя праз сацыяльную сетку», быў заблакаваны правайдэрамі.

Фота: «Радыё Свабода»