Амапавец карэспандэнту «КП»: «Закон - гэта ў Амерыцы! Дзяцей маіх ты карміць будзеш?»

• 14.07.2011, 10:30

Міліцыянты, якія выконваюць злачынныя загады, апраўдваюцца «клопатам аб дзецях».

Цяперашняя акцыя маўклівага пратэсту ў Гомелі прайшла сапраўды моўчкі, піша «КП в Беларуси».

- Мы тут таму, што мы супраць забаронаў. Калі мне нешта забараняюць - элементарна прайсці па вуліцы, напрыклад, - я з гэтым не магу згаджацца, - кажа маці дваіх дзяцей, якая прыйшла на акцыю.

Пакуль журналісты размаўлялі з жанчынай, міліцыянты ў чорных майках выхапілі з натоўпу маладога чалавека і пацягнулі ў аўтобус. Хлопец ўпіраўся, крычаў, і як толькі карэспандэнт «КП в Беларуси» Павел Міцкевіч дастаў фотаапарат, каб засняць гэтую карціну, двое спецназаўцаў ўзялі яго пад рукі і таксама зацягнулі ў аўтобус:

- Пойдзем-ка з намі, фотаздымкі твае праверым!

- Што вы робіце, я журналіст, вы парушаеце закон!

- Закон - гэта ў Амерыцы! - адказвае малады міліцыянт. - А для мяне закон - гэта загад начальніка. Мне сказала кіраўніцтва цябе затрымаць, і я гэта зрабіў.

- Але загад твайго начальніка незаконны! У цябе ж у самога галава на плячах ёсць, сумленне табе што гаворыць?!

- Калі я не выканаю загад, дзяцей маіх ты карміць будзеш?!

Тым часам па рацыі паведамілі, каб у адносінах да хлопца, якога толькі што цягнулі ў аўтобус, складалі пратакол за непадпарадкаванне супрацоўнікам міліцыі. Малады чалавек спрабуе патэлефанаваць, але на яго крычаць:

- Калі не выключыш тэлефон, завязем ў КДБ!

Нікога не адпускаюць і вязуць у райаддзел міліцыі. Карэспандэнту «КП» дазваляюць выйсці з аўтобуса пасля ўмяшання начальніка прэс-службы УУС.