Чуткі пра падаражэнне цукру абвяргаюць

• 20.07.2011, 10:51

У міністэрствах гандлю і эканомікі, а таксама ў канцэрне «Белдзяржхарчпрам» абвяргаюць чуткі пра падвышэнне кошту цукру ў бліжэйшы час.

Чарговы ажыятажны попыт на цукар-пясок, выкліканы чуткамі аб ягоным хуткім падаражэнні, назіраецца ў крамах Менска з учорашняга дня. Па чутках, кошт цукру павялічыцца з цяперашніх 5.000 рублёў за кілаграм да 7.000 і нават 10.000. У некаторых крамах, па словах прадаўцоў, 19 ліпеня было прададзена цукру-пяску столькі ж, колькі звычайна прадаецца за тыдзень.

Каментуючы БелаПАН сітуацыю, у «Белдзяржхарчпраме» заявілі: «Нікога павышэння кошту цукру няма і не плануецца ў бліжэйшы час». У Мінгандлі адмовіліся «каментаваць чуткі». У Мінэканомікі паведамілі, што нікога рашэння аб павышэнні кошту цукру няма і ў бліжэйшы час не рыхтуецца. Няма інфармацыі аб хуткім падаражэнні цукру і ў прадпрыемства «Белбакалея», якое займаецца яго фасоўкі і аптовым продажам.

Варта адзначыць, што рознічныя кошты на цукар у Беларусі выраслі 28 мая амаль на 40%. Рознічны кошт на цукар-пясок вагавы, упакаваны ў мяшкі па 50 кг, складае 4.600 рублёў (раней - 3.290) за кілаграм, на расфасаваны ў спажывецкую ўпакоўку па 1 кг - 5.000 рублёў (раней - 3.600).

Па дадзеных Белстата, у студзені-чэрвені было прададзена 97,8 тыс. тон цукру, што перавысіла аналагічны леташні паказчык на 53,5%.