Аварыя на помпавай станцыі ў Менску
- 26.07.2011, 11:42
Пяць чалавек пацярпелі ў выніку аварыі на газавай помпавай станцыі ў аўторак у Менску.
Пра гэта паведаміў РІА Новости прадстаўнік МНС Беларусі Віталь Навіцкі.
«На помпавай станцыі пры правядзенні планавых зварачных работ адбылася ўспышка газу без наступнага гарэння», - распавёў суразмоўца агенцтва.
Па ягоных словах, пакуль незразумела, «адкуль узяўся газ, які ўспыхнуў».
«Меркаваная прычына здарэння - парушэнне супрацьпажарных патрабаванняў пры правядзенні агнявых прац», - дадаў суразмоўца агенцтва.
Па дадзеных МНС, у выніку аварыі пяцёра чалавек з апёкамі рознай ступені цяжкасці і траўмамі дастаўленыя ў медыцынскія ўстановы Менска.
***
Як паведамляе прэс-служба МНС у твітэры, аварыя адбылася на каналізацыйнай помпавай станцыі.
Фота: МНС