Беларускіх чыноўнікаў не пусцілі ў Літву
- 12.08.2011, 9:10
Намеснік міністра юстыцыі Беларусі Ала Бадак і некалькі высокапастаўленых чыноўнікаў не былі прапушчаныя праз літоўскую мяжу.
Пра гэта ў чацвер увечары паведаміў BNS са спасылкай на інфармаваныя крыніцы.
Па звестках агенцтва, наўпрост на мяжы літоўскія памежнікі вырашылі вярнуць назад суддзю Вярхоўнага суду Аляксея Рыбакова і дваіх дэпутатаў. Аднак у Літву прыбыла група іншых чыноўнікаў, сярод якіх прадстаўнікі Генеральнай пракуратуры і Міністэрства ўнутраных справаў, паведамляе ЛТБ.
Літоўскае тэлебачанне паведаміла ў чацвер увечары, што намеснік міністра юстыцыі Бадак ўключаная ў спіс беларускіх чыноўнікаў, складзены ЕЗ, якім забаронены ўезд на тэрыторыю супольнасці.
Міністэрства замежных справаў пакуль не прадаставіла інфармацыі, ці былі Бадак і іншым беларускім чыноўнікам, адпраўленым у Менск, выдадзеныя літоўскія візы, паведамляе DELFI.
Па дадзеных BNS, візіт быў запланаваны на 9-12 жніўня, у ходзе яго было запланаванае знаёмства з метадамі, якія ўжывае Літвы ў барацьбе з наркаманіяй.
Нагадаем, што ЕЗ забараніў уезд на тэрыторыю супольнасці некалькім сотням прадстаўнікам беларускіх уладаў у сувязі з тым, што рэжым Аляксандра Лукашэнкі распачаў рэпрэсіі супраць апазіцыі пасля прэзідэнцкіх выбараў у снежні 2010 года.
Між тым, беларуская служба «Радыё Свабода» паведамляе, што намесніца міністра юстыцыі знаходзіцца ў Вільні, нягледзячы на тое, што ў дачыненні да яе дзейнічаюць санкцыі Еўразвяза, якія забараняюць ёй ўезд у краіны супольнасці.
Пастанова Савета міністраў Беларусі аб камандзіраванні Бадак ў Вільню падпісанае прэм'ер-міністрам Міхаілам Мясніковічам 6 жніўня.
МЗС паведамляе, што амбасада Літвы непажаданым асобам (персонам нон грата) візаў не выдавала.
«Магу сказаць толькі тое, што Міністэрства замежных справаў не мае дачынення да візіту беларускіх чыноўнікаў у Літву. Іхняй праграмы (міністэрства) не мае, і, па наяўных дадзеных, амбасада Літвы не выдавала візаў асобам, якія ўключаны ў спіс непажаданых асобаў», - сказаў прадстаўнік МЗС Міндаўгас Лашас.
Паводле неафіцыйных дадзеных, візіт беларускіх чыноўнікаў праходзіць у Літве па запрашэнні міжнароднай арганізацыі. Ці ёсць сярод прыбылых Бадак, літоўскія ўстановы высвятляюць.
Згодна з рашэннем ЕЗ, санкцыі могуць быць адмененыя толькі пасля таго, калі будуць вызваленыя ўсе затрыманыя лідэры апазіцыі.