Пікеты ў падтрымку Бяляцкага ўсюды забараняюць

• 19.08.2011, 12:27

Гомельскі гарвыканкам адмовіў праваабаронцам Анатолю Паплаўнаму, Віктару Адзіночанку і Леаніду Судаленку ў правядзенні пікетаў у падтрымку Алеся Бяляцкага 22 жніўня.

Як вынікае з рашэння гарадскіх уладаў, заяўнікі не выканалі патрабаванні рашэння гарвыканкама аб заключэнні пагадненняў з органамі міліцыі, медыцыны і камунальнымі службамі аб уборцы тэрыторыі.

Акрамя таго, чыноўнікі ўзгадалі, што праводзіць мірныя сходы грамадзянам дазволена толькі ў адным месцы - так званым гомельскім «Бангалоры», на адкрытай пляцоўцы каля ДК культуры ПУП «Віпра», у той час як праваабаронцы замовілі пікеты практычна на цэнтральных пляцоўках Гомеля.

Праваабаронцы лічаць, што Гомельскі гарвыканкам, які ўжо шмат гадоў адмаўляе заяўнікам праводзіць пікеты і акцыі, парушае правы грамадзянаў на свабоду правядзення мірных сходаў.

Падаўцы заяўкі маюць намер аспрэчыць рашэнне аб адмове ў Гомельскім абласным судзе.