«Стоп-бензін» заблакуе галоўныя праспекты Менска
- 22.08.2011, 9:11
Аўтааматары рыхтуюцца адказаць на чарговае павышэнне коштаў на паліва акцыяй «Стоп-бензін».
У панядзелак у 19.00 неабыякавыя маюць намер стыхійна сабрацца на розных вуліцах, прылеглых да праспектах Незалежнасці і Пераможцаў, і выехаць у цэнтр, каб заблакаваць рух, піша «Салідарнасць».
Канцэрн «Белнафтахім» 20 жніўня ў сярэднім на 3% павысіў рознічныя кошты на паліва. Гэта ўжо шостае падаражэнне з пачатку года.
Перагляд коштаў на нафтапрадукты здзейснены ў мэтах паэтапнага раўнавання коштаў на тавары ў краінах Мытнага саюза, - гаворыцца ў паведамленні канцэрна. «Белнафтахім» падкрэслівае, што «дзеючыя рознічныя кошты (з улікам павелічэння) на аўтабензіны АІ-92 і Аі-95 застаюцца ніжэйшымі за ўзровень аналагічных коштаў у Расейскай Федэрацыі на 3%».
Першымі на падаражанне адрэагавалі прадпрымальнікі, якія займаюцца транспартнымі перавозкамі. Яны паднялі кошты на праезд у маршрутках. Да прыкладу, кошт праезду з Менска ў Салігорск паднялася з 20 да 25 тысяч рублёў.
Тыдзень пачнецца з акцыі «Стоп-бензін».
Як паведаміў кіраўнік інфармацыйна-асветніцкай установы «За Аўто» Арцём Шаркоў, аб акцыі, якая рыхтуецца, ён даведаўся ад аўтамабілістаў.
- Вядома, што акцыя пройдзе ў фармаце 7 чэрвеня. Не магу выказаць здагадку, ці стане яна масавай, нягледзячы на летні сезон, - сказаў суразмоўца і падкрэсліў, што рух «За Аўто» не з'яўляецца арганізатарам акцыі.
Акцыя «Стоп-бензін» 7 чэрвеня ўвайшла ў гісторыю як «рэвалюцыя на колах».
Больш за 1500 аўтамабілістаў на 2 гадзіны паралізавалі рух на праспекце Незалежнасці, пратэстуючы супраць шокавага павышэння коштаў на паліва. Некаторыя спынялі машыны, адчынялі капоты і імітавалі рамонтныя працы. Аўтааматараў падтрымалі пешаходы, якія віталі ўдзельнікаў акцыі крыкамі і апладысментамі.
Абочыны і праезная частка каля станцыі метро Кастрычніцкая былі ўсыпаныя дробнымі купюрамі беларускіх рублёў. Іх выкідалі як кіроўцы, так і мінакі, жадаючы прадэманстраваць, што беларускі рубель сёння нічога не каштуе.
Даішнікі не былі гатовыя да выразна арганізаванага супрацьстаяння і не змаглі разблакаваць праспект з-за ягонай загружанасці.
На наступны дзень пасля масавай акцыі пратэсту аўтамабілістаў Аляксандр Лукашэнка распарадзіўся знізіць кошты на бензін.
Тады ён паабяцаў, што ў далейшым кошт на бензін не будзе расці рэзка, а будзе прывязаны да курсу даляра:
- І да 1 студзеня, калі ў нас будзе курс не тое 5.000, не тое 4.500: калі 4.500 - такім і застанецца, калі 5.000 - значыць, да 1 студзеня будзеце працаваць па коштаўтварэнні, у квартал дадаючы па 2-3%, калі гэта трэба будзе. Але не на 30%.
9 чэрвеня кошты на нафтапрадукты былі зніжаныя на 13-22%.
Пасля чарговага павышэння коштаў на паліва праваахоўныя органы не дапусцілі правядзення другой акцыі «Стоп-бензін» 21 ліпеня, заблакаваўшы выезд на праспект Незалежнасці ўсіх відаў транспарту, акрамя грамадскага.
Тым часам інфармацыйна-асветніцкая ўстанова «За Аўто» рыхтуе прапановы канцэрну «Белнафтахім» і ўраду, якія тычацца коштаўтварэння на паліва.
- Ва ўмовах дэвальвацыі рубля і падзення ўзроўню жыцця павышаць кошты на бензін - забойства для сямейнага бюджэту, - лічыць Арцём Шаркоў.
Нагадаем, 31 жніўня рух «За Аўто» арганізуе круглы стол для абмеркавання пытанняў, звязаных з ростам кошту паліва. Прадстаўнікі «Белнафтахіма», Міністэрстваў транспарту і эканомікі пакуль не пацвердзілі свой удзел у форуме.